7. In Vigiliis Nativitatis BMV.

Ad Vesperas.
Lucernarium.

R. Orta stella resplenduit,
Quae verum solem genuit,
Christum, lumen de lumine.
Deum natum de virgine ;

V. Matrem in terris filius
Luce lustravit gratiae,
In coelis hanc illuminans
Splendore suae gloriae.

In Choro.

A. Interpretata gratia
Produxit Anna hodie
Omni repletam gratia,
Matrem regis clementiae,
Quae nobis gratum protulit
Datorem omnis gratiae.

Cum Infantibus.

R. Festum de nata virgine
Plebs celebret catholica,
Cantet et hujus hodie
Praeconia magnifica;

V. Nulla lingua taceat
Laudes Mariae virginis,
Quam felix Anna peperit
Davidicae propaginis.

A. Regina venerabilis,
Exorta felix hodie,
Adstat a dextris filii
Veste vestita gloriae.

A. Sanctificavit Dominus
Mariae tabernaculum,
Quod postea ingreditur
Ad redimendum populum.

In Magnificat.
A. Magnificate Dominum,
Omnes fideles populi,
Ejus matrem magnificam
Natam laudate seduli,
Ex qua rex est magnificus
Natus redemptor saeculi.

Psallentium in Baptisterio.

Adjuvare nos festina,
Nata stella matutina,
Vitiorum nos de spinis,
Virgo, duc ac de ruinis,
Fac vitare nos infernum,
Regnum nobis da supernum.

Ad Vigilias.

Post hymnum.

R. Anna gaude fructifera,
De qua virgo Christifera
Processit salutifera,
De Nazareth haec florida
Producens florem nitida
Fert Christum fructum lucida ;

V. Cujus sapor dulcissimus
Et odor suavissimus
Valor pretiosissimus
Et decor venustissime.

A. Ancilla parit dominam
Et matrem ejus filia,
Dum ex Anna producitur
Cunctorum mater regia.

R. Nobis succurre miseris,
Nata proles deifera,
De vinculis mortiferis

Nos, pia virgo, libera,
Ne damnemur cum inferis
Propter patrata scelera.
V. Nos, spes humani generis,
Tuo nato confoedera,
Fac, ut fruamur superis
Per sanctitatis opera.

A. De Jesse virga pullulat,
Quae duces Moab stimulat,
Percutiens daemonia,
Tollens ejus imperia.

R. Gaudeamus de puella,
Regis David parentela
Nata ut sol, luna, stella ;
Haec est virgo Dei cella,
Hostis nostri frangens tela,
Concitantis saeva bella ;

V. Per hoc mare nos, Maria,
Regat, ducat mater pia
Pietatis suae velis,
Ne mergamur in procellis.

A. Matrem fundat altissimus
Aeterna sapientia,
In qua Deus efficitur
Homo de stirpe regia.

Psallentium.

De radice prodiit
Jesse virga florida,
Virgo florem proferens,
Stella maris fulgida.

R. Domum fundavit Dominus
Beatam sibi virginem,
Qua factus homo recipit
Veram carnis originem;

V. Domus lata caritate,
Alta stat humilitate,
Munda per castimoniam,
Haec firma per constantiam.

Psallentium.

Ex justis ante Dominum,
Virgo, nata parentibus,
Tuum nobis propitium
Natum fac tuis precibus.

Post Kyrie.

Singularis peccatorum
Spes, regina supernorum,
A languore nos cunctorum
Sana, virgo, vitiorum,
Nos ad regna duc polorum,

Ad Matutinum.
Post hymnum.

R. Christe, proles deiferi
Nate Mariae uteri,
Clemens humano generi
Ope succurre celeri
Nos sorde mundans veteri,
Captivos datos sceleri ;

V. Ut per te facti liberi,
Pio vacantes operi,
Vitemus poenas inferi,
Coetus consortes superi.

Ad Lectiones.
Responsoria.

1. Verbi patris mater pura,
Ejus simul et factura,
Felix Annae genitura,
Nos defende pia cura ;

V. Nos spernentes transitura
Duc ad bona permansura
Reddens nobis poli jura.

2. De Jesse virga floruit,
Quae salvatorem genuit,
Plana sine ramusculis,
Peccati carens tribulis,
Fuit et virga tenuis
Haec per rerum inopiam,
Virga semper flexibilis
Haec per misericordiam ;

V. Haec virga recta jugiter
Est contemplans coelestia,
Haec Jesse virga aestuat
Amoris per incendia.

In Benedictus.
A. Sit Dominus ab omnibus
Benedictus viventibus,
Qui benedictionibus
Matrem replet coelestibus.

Ad Crucem.
A. Natae Mariae viscera

Portant hunc, lactant ubera,
Qui fecit terram, aetbera,
Mare, coelum et sidera,
Passus in cruce vulnera
Pro nobis salutifera.

In Cantemus.
A. Cantemus laudes Domino,
Cujus matrem gratiosam
Beatam dicunt populi
Venerantes gloriosam.

In Benedicite.
A. In festo natae virginis
Coelum, terra, maria,
Benedicite Domino,
Qui creavit omnia.

In Laudate.
A. In tympanis et organis,
Chordis bene sonantibus
Natam laudemus virginem
Omnes cum sanctis omnibus.

Psallentium in Baptisterio.

Orta patre, matre claris,

Dignitate singularis,

Tu, quae Deum virgo paris,

Nos regina tuearis,

Ne nos undis mundi maris

Naufragemus in amaris.

Mane ad Psallentium.
Antiphonae.

1. Adsit nobis laetitia
Magna cam coeli curia
De nata matre regia,
Quae reparat coelestium
Statum atque terrestrium.

2. Ex Annae matris utero
Processit proles hodie,
Quae redemptorem peperit
Christum solem justitiae.

3. Exaltat Deus Joachim
Singulari dignitate,
Avum sibi praeeligens
Redimitum sanctitate,
Qui matrem Dei generat
Excellentem puritate.

4. Fecit magna Dominus
Mariae natae virgini,
Dum repletam gratia
Puro ipsam homini
Praetulit in gloria
Et superno agmini.

5. O quam felix, quam utilis
Est Mariae nativitas,
Qua tollitur miseria,
Datur nobis felicitas.

6. Nativitatem virginis
Colamus nostrae dominae,
Natae regum, prophetarum,
Patriarcharum sanguine.

7. Nata prae cunctis hodie
Mater Dei gratiosa
Super choros angelicos
Sublimatur gloriosa.

8. Arbor nata fructifera

Fructum profert Christifera,
Per quem de valle misera
Reducimur ad supera.

9. Ex patriarchae Abrahae
Orta virgo semine
Concepit Dei filium
Mystico spiramine.

Post Kyrie.
Omnes concives superi,
Magno gaudete gaudio,
Quos Dominus magnificat
Immenso beneficio,
Natam donans virgineam,
eparatricem hominum
Et supernorum etiam
Restauratricem agminum.