8. In Vigiliis beati Mauritii Episcopi.

Ad Vesperas.

Lucernarium.

R. Ut lux fuit Maurilius

In tenebris sedentibus,

Gentes caecas illuminans

Fide, verbis, operibus ;

V. Hic quem in terris Dominus

Lustravit luce gratiae,

Nunc est in coelis lucidus

Luce perennis gloriae.

In Choro.

A. In maris mundi positos

Periculosis fluctibus,

Maurili pater, adjuva

Nos tuis sanctis precibus,

Qui salutis remedium

Donasti naufrantibus,

Duc nos ad portum gloriae,

Fac nos frui coelestibus.

Cum Infantibus.

R. Solemni cum laetitia

Fidelium ecclesia

Congaudeat Maurilio

In ejus natalitio ;

V. Hujus sancti memoria

Sit cunctis venerabilis,

Ut hic in nostris precibus

Reddatur exaudibilis.

A. Praesul justus Maurilius

Laboravit finaliter,

Quem Christus nunc remunerat

In coelis aeternaliter.

A. Erit justus Maurilius

In aeterna memoria,

Qui nunc cum sanctis omnibus

Perenni gaudet gloria.

In Magnificat.

A. O Maurili, magnificis

Magnifica praeconiis

Christum, qui te magnificat

Cum gloriosis praemiis.

Psallentium in Baptisterio.

Maurili, nobis subveni

Tuis beatis precibus,

Defende tuos famulos

A malis imminentibus,

Vitam nostram nos agere

Fac in sanctis operibus.

"

Ad Vigilias.

R. A Martino Maurilius

Ordinatus est levita,

Sacerdos atque pontifex,

Cujus viri tota vita

Fuit ab annis teneris

Sanctitate redimita;

V. Corpus conculcans proprium

Hic frequenter jejunabat,

Austerus hic vigiliis

Hoc orando castigabat.

A. Mediolanensium

Pontifex eximius,

Lectorem Maurilium

Ordinat Ambrosius.

R. Maurili, serve Domini,

Clemens, prudens et fidelis

In hac valle miseriae

Subvenire nobis velis,

Ne nos carnis, diaboli

Vulneremur diris telis.

V. Tu nostram navem dirige

Pietatis tuae velis,

Ne nos mundi vertigine

Naufragemur et procellis.

A. Frequentibus se macerat

Maurilius jejuniis,

Crebris orationibus,

Assiduis vigiliis.

R. Andegavensis civitas,

Magnis exsulta laudibus,

Tuis donatur pontifex

Maurilius concivibus ;

V. Qui te divinis instruens

Verbis, sanctis operibus

Te ad salutem revocat,

Miris fulgens virtutibus.

A. Episcopus Maurilius

Miris pollens virtutibus

Viros leprosos liberat

A cunctis leprae sordibus.

Psallentium.

Donavit Deus gratiam

Magnificam Mamilio,

Per quam fugavit daemones

Suo multos imperio.

E. Virum sanat Maurilius

Laesum a morsu viperae

Impresso sibi primitus

Sanctae crucis charactere;

V. Ad Domini servitium

Coepit iste recurrere,

Quem Deus per Maurilium

Sanam dignatur reddere.

Psallentium.

Ex Mediolanensibus

Maurilius parentibus

Fuit ortus nobilibus.

Post Kyrie.

A. Talenta sacra duplicans

Servus Christi Maurilius,

Fidelis constituitur

Supra multa industrius.

A d Matutinum.

Post hymnum.

R. Resplenduit Maurilius

Miraculis insignibus,

Quam plures aegros liberans

A variis languoribus;

Hic curat, paraliticos,

Dat lumen non videntibus,

Sanat cum quartanario

Contractum membris omnibus ;

V. Annis jacentem puerum

Jam septem clausum tumule

Resuscitat Maurilius

Suae vocis oraculo.

Ad Lectiones.

Responsoria.

1. Dum subiret naufragium

Navis onusta mercibus

In aquarum vertigine

Turbatis maris fluctibus,

Signo crucis Maurilius

Succurrit naufragantibus,

Cunctis suum suffragium

Devote imperantibus ;

V. Hujus beati meritis

Et intercessionibus

Nautae ad litus applicant

Salvis personis, mercibus.

2. Dum Martinus consecrat

In praesulum consocium,

In columbae specie

Sedet super Maurilium

Testans ejus merita

Mitis et sanctus spiritus,

Quibus et tunc adstitit

Angelicus exercitus.

V. O quam dignus Maurilius

Honoris reverentia,

Quem tantum honorificat

Deus cum coeli curia.

In Benedictus.

A. Benedictus Dominus

Benedixit Maurilium,

Quem recepit hodie

In agmine coelestium.

Ad Crucem.

A. Passionis memoria

Christi sit nostris mentibus,

Quam in cruce sustinuit

Pro nobis peccatoribus,

Quem secutus Maurilius

Cum cruce poenitentiae

Venit per vitam asperam

Ad locum omnis gloriae.

In Cantemus.

A. Sanavit manus aridas

Signo crucis imposito

Et usui Maurilius

Restituit has solito.

In isenedicite.

A. Benedicite Domino,

Cuncta ipsius opera,

Qui hodie Maurilium

Adduxit super sidera.

In Laudate.

A. Collaudemus Maurilium

Nos cum festivis laudibus,

In cymbalis et organis,

Choris bene sonantibus.

Psallentium in Baptisterio.

Mulieri, quae fuerat

Cum viro diu sterilis,

A Deo per Maurilium

Puer datur placibilis.

Mane ad Psallentium.

Antiphonae.

1. Signo crucis Maurilius

Daemonium de femina

Pellit, ipsi restituens

Caecae optata lumina.

2. Divina fretus gratia

Quatuor Maurilius

Resuscitavit mortuos,.

Confessor egregius.

3. In divinis scientiis

Doctus et liberalibus

A Martino Maurilius

Ab annis puerilibus,

Doctorem suum sequitur

Cum sanctitatis gressibus.

4. Placens Deo Maurilius

Per sanctitatis opera

Inter discordes pontifex

Componit pacis foedera.

5. Maurilius se induit

Aspero cilicio,

Corpus suum subjiciens

Spiritus imperio.

6. Artam vitam Maurilius

Monachorum deseruit,

Qui artiorem ducere

Solus vivendo maluit.

7. Aetatis nonagesimo

Suae anno Maurilius

Migrans de carnis carcere

Fit supernorum socius.

8. Pia prece Maurilii

Igne demisso coelitus

Idolorum consumitur

Locus culturae deditus.

Post Kyrie.

A. Instar cameli genuum

Maurilii sunt genua

Dura facta cum cubitis

Flexione assidua.

In 2. Vesperis.

In Choro.

A. Latens praesul Maurilius

Sub hortulani specie,

A nuntiis fidelibus

Andegavensis patriae

In pisce claves recipit

Repertas dono gratiae,

Sub quibus clausae fuerant

Venerandae reliquiae.