10. In Vigiliis sanctarum undecim
milium virginum.

Ad Vesperum.
Lucernarium.

R. Dux et magistra virginum,
Ursula virgo, Dominum
Exora, patrem luminum,

V. Ut omni mundi crimine
Fruamur vero lumine
Cum beatorum agmine.

In Choro.
A. Magna gaude Germania,
Felix felici agmine,
Laetare tu, Colonia,
Quae virginum tot sanguine
Contempta idolatria
Fuso pro Christi nomine
Ornaris et militia
Coeli locata culmine.

Cum Infantibus.

R. Ducunt constantes virgines,
Ursula et consociae,
Ad cultum Christi plurimos
Exemplis patientiae,
Omni virtutum gratia
Pollentes cum justitia ;

V. Beatae, quae non ambulant
In pravorum consilio.
Et quae morari respuunt
In peccatorum devio.

A. Inflammatae caritate

Zelant sponsum, sunt paratae
Pro ipso mortem sumere
Magis quam mundo vivere.

A. Istae sponsae sunt regales
Mensae Christi consodales,
Quae cum choro virginali
Sponso cantant immortali.

In Magnificat.
A. Magnifica militia

Coetus undecim milium
Magna facta ecclesia
Regem collaudet omnium.

Psallentium in Baptisterio.

Sponsae regis angelorum,
Verae vitis propagines,
In odorem unguentorum
Sponsi concurrunt virgines,
Mundaemundumservant thorum,
Carnis vitant voragines.

Ad Vigilias.

R. Ursula et consociae
Virginalis munditiae
Desponsatur immortali
Sponso, non in mundo tali,
Qui est sponsus speciosus.
Prudens, dives, gloriosus.

V. Regum rex hic generosus,
Per quem homo criminosus
A peccatis expiatur
Et ad regnum revocatur.

A. In horto sunt ecclesiae
Per castitatem lilia,
Et rosae per martyrium
Sunt undecim haec milia.

R. Inaudita res miranda,
Mira res cunctis narranda,
Papa, multi episcopi
Mulierem juvenculam
Perpessi sunt martyrium
Sanctam sequentes Ursulam ;

V. Qua duce omnes praevia
Intrant regna coelestia
Aeterna cum laetitia.

A. In his floribus rosarum,
Liliorum, violarum
Sponsus pascit praedilectus
Et ex milibus electus.

R. Sponsi fervens in amore
Trahitur ejus odore
Virginalis constantia
Liliorum cum candore
Hunc martyrii cruore
Haec sequitur per omnia ;

V. His singulis martyribus
Atque sacris virginibus
Binae dantur aureolae,
Quae sunt cum sanctis omnibus
Factae coelestes incolae.

A. Fuerunt istae virgines
Fortes Christi pugnatrices,
Quas per virtutem fidei
Reddidit ipse victrices.

Psallentium.

Christum adolescentulae
Praedilexerunt sedulae,
Pro quo mortem subierunt
Et terrena contempserunt,
Currentes ad supplicia
Ut ad sponsi convivia.

R Mira morum honestate,
Castitatis claritate,
Fama et sapientia
Refulget regis filia ;

V. Rex concupivit Ursulam
Pro ejus pulchritudine,
Quae corporis et animae
Erat in sancta virgine.

Alia Psallenda.

Veneretur ecclesia
Societatem virginum,
Quae cantans agnum sequitur,
Qui est redemptor hominum.

Post Kyrie.

A. Virgo devota Ursula
Fide Christi praeambula
Virginalem militiam
Ducit ad regis curiam.

Ad Matutinum.
Post hymnum.

R. Stirpe natam regia
Virginem juvenculam
Christus, Dei filius,
Sponsat sibi Ursulam,
In sponsi obsequiis
Vigilem et sedulam ;

V. Undecim haec milium

Chorum convertit virginum,
Per durum supplicium
Istas ducens ad Dominum.

Ad Lectiones.
R esponsoria.

1. Regna carnis, diaboli,
Mundi falsi et subdoli
Per fidem Christi famulae
Vincunt pugnantes sedule
Consortes sanctae Ursulae;

V. Armis munitae fidei
Pugnant in sexu fragili,
Hostes sibi subjiciunt
Victoria mirabili.

2. Honoribus, divitiis,
Spretis carnis deliciis
Perfruuntur perennibus
Bonis cum sanctis omnibus;

V. Laetetur ecclesia,

Quam virginum jucundam
Reddunt natalitia
Ostendunt et fecundam.

In Benedictus.

A, Sit benedictus Dominus,
Qui cum sanctis virginibus
Suam ductricem Ursulam
Donat frui coelestibus.

Ad Crucem.

A. Virginalis militia,
Crucifixi vestigia
Secuta per martyrium,
Per viam patientiae
Migrat ad coeli solium,
Locum omnis laetitiae.

In Cantemus.

A. Cantemus Deo gloriam
Nos redemptori omnium,
Qui beatis virginibus
Coeleste donat bravium.

In Benedicite.

A. Benedicant Domino
Ejus mira opera,
Pro quo passae virgines
Sunt gaudentes aspera.

In Laudate.

A. Laudemus nomen Domini
Vocibus sonoris,
Revereamur Ursulam
Omnes cunctis horis.

Psallentium.

A. Barbarorum saevitiae
Ferro colla subjiciunt
Deo dicatae virgines,
Mortem laetae suscipiunt,
Quae peremptae pro Domino
Veram vitam inveniunt.

Mane ad Psallentium.
Antiphoaae.

1. Ad festum sanctae Ursulae
Concurrant omnes populi,
Venerentur et virgines
Magni, majores, parvuli,
Ut nobis sint propitiae,
Rogemus omnes seduli.

2. Quae cum sponso nunc gaudetis,
Oleo vasis repletis,
Orate, ut dum janua
Patet, sponsus largitiua
Nos gratia recipiat
Et nuptiis reficiat.

3. Ut angelus praedixerat
Reversae sunt Coloniam,
Omnes adeptae virgines
Martyrii victoriam.

4. Quam pulchra tabernacula
Inhabitas nunc, Ursula
Cum beatis virginibus
Semper agnum sequentibus.

5. Stat regis nata Ursula
A dextris tuis, Domine,
Te Deum sponsum eligens
Spreto mortali homine.

6. Cognita pulchritudine
Ac ejus magnitudine
Princeps Hunnorum Ursulam
Sibi petit in uxorem,
Quae cum eum respueret
Christi praeferens amorem,
Per principem transfigitur
Sagitta et sic moritur.

7. Sit sanctarum multitudo
Semper nobis fortitudo,
Per quam carnem, diabolum,
Mundum vincentes subdolum
Mereamur ad praemia
Pervenire coelestia.

Post Kyrie.

A. Ora pro nobis, Ursula,
Ut vitemus pericula
Et coeli habitacula
Intremus sine morula.