11. In Vigiliis Omnium Sanctorum.

Ad Vesperum.

Lucernarium.

R. Christe, lumen de lumine,
Qui natus es de virgine,
Da videre sine fine
Nobis lumen in lumine ;

V. O vera lux credentium,
Illuminatrix cordium,
Da nobis lucis radium.

In Choro.

A. Sancti omnes et singuli,
Magno gaudete gaudio,
Vobis datum est perfrui
Vitae perennis praemio,
Quos opibus, deliciis,
Perpetuis honoribus
Magnificavit Dominus.
Vos replens bonis omnibus.

Cum Infantibus.

R. Festum sanctorum omnium
Celebremus solemniter,
Revereamur singulos
Sanctos honorabiliter,
Qui nunc gaudent in gloria
Triumphantes feliciter ;

V. Quorum beatis meritis
Suffragiis et inclitis
Tanto magis adjuvamur,
Hos quo magis veneramur.

A. In sancta sit ecclesia
De matre plena gratia
Digna commemoratio
Et sanctorum laudatio.

A. Omnes sancti merito
Sunt adepti gloriam,
Habentur in laudibus
Nunc apud ecclesiam.

In Magnificat.

A. Magnificis cum laudibus
Magnificum per omnia
Festum sanctorum omnium
Magnificet ecclesia,
Ut, quae non valet singulis
Honorem festi reddere,
Hunc una die conferat
Saltem cunctis in genere.

Psallentium in Baptisterio.

Sub una die celebri
Celebremus memoriam
Dignam sanctorum omnium
Multiplicantes plurium
Intercessorum copiam.

Ad Vigilias.

R. Constantes sancti martyres
Contempserunt supplicia,
Quae passi sunt pro nomine
Christi dira et varia,
Afflicti serris, ungulis,
Equuleo, lapidibus,
Igne, fame et carcere,
Sagittis et leonibus,
Plumbo, resina, sulfure,
Plagis, cruce, serpentibus ;

V. Verberantur acerrime
Avulsis cute, dentibus,
Mersi aquis, fracti rotis
Plectuntur et capitibus.

A. Sancti regna contempserunt,
Quae per fidem devicerunt,
Operati justitiam
Et consecuti gloriam.

R. Ornatis cum lampadibus
Non oleo carentibus
intrant sponsae ad nuptias
Dapes habentes regias,
Quibus delectabiliter
Fruuntur et feliciter.

V. O quam felix collegium,
O beatum convivium,
Quo angelorum ordines
Sunt justi atque homines.

A. Sunt reverenda agmina
Beatorum angelorum,
Qui vitam nostram muniunt
Ab incursu malignorum
Et nos ad Christi transferunt
Regnum plenum gaudiorum.

R. Data talenta dnplicant
Sancti pastores ovium
Intrantes sui domini
Servi fideles gaudium ;

V. Qui non in terra fodiunt
Occultantes pecuniam,
Sed hanc ipsi multiplicant
Prudentes per industriam.

A. Prudentes intrant virgines
Ad nuptias largifluas,
Quibus coronas exhibet
Sponsus Christus perpetuas.

R. Festum sanctorum omnium
Colat venerabilium
Cunctorum plebs fidelium ;

V. Hos roget, ut frequentibus
Omnes nos piis precibus
In coeli locent sedibus.

Psallentium.

Sanctorum festum omnium
Solemnizat ecclesia,
Ut se in ipso expient
De sua negligentia,
Qui festi minus celebrant
Devote singularia.

Alia Psallentia.

1. Omnes orate Dominum,
Reverendi patriarchae,
Ut exutos miseriis
Nos coelorum locet arce.

2. Qui in coena Domini
Ad mensam sedetis,
Suo ut nos foveat
Pane, hunc rogetis,
Locum nobis exhibens
Aeternae quietis.

3. Donum beati spiritus
Vos, prophetae, recepistis,
Per quem de Deo homine
Christo vera praedixistis.

R, Sancti Christi apostoli,

Lux mundi, sal et principes,
Judicare duodecim
Tribus electi judices,

V. Christianorum populo
Celeriter succurrite,
Pro nobis, vestris famulis,
Preces ad Deum fundite.

Psallentium.

Omnes vocibus sonoris
Sanctis servis redemptoris
Odas laudis et honoris
Concinamus cunctis horis.

Post Kyrie.

A. Sancti spretis deliciis,
Honoribus, divitiis
Delectantur exaltati
Nunc in coelis honorati.

Ad Matutinum.

Post hymnum.

R. Est in coelesti patria
Magna sanctorum gloria,
Ubi nulla miseria,
Qui perfecte sunt beati,
Excellenter honorati,
Cunctis bonis sunt ditati ;

V. A quorum Deus oculis
Abstersit omnem lacrimam,
Eis dolorem auferens,
Luctum, mortem teterrimam.

Ad Lectiones.
Responsoria.

1. Pulchris amoenum floribus
Est Christi viridarium,
Quo rubicundi martyres
Ut rosae per martyrium
Sunt et prudentes virgines
Candentes velut lilium,
Confessores ut violae
In agmine humilium;

V. In his floribus rosarum,
Liliorum, violarum
Sponsus pascit praedilectus
Et es milibus electus.

2. Deus, qui est mirabilis
In sanctis suis omnibus,
Ipsos sanctos mirificat
Miraculis insignibus:
Linguam mutis, gressum claudis,
Visum dant non videntibus,
Sanant languores varios
Et imperant daemonibus;

V. Fixis calcant vestigiis
Super profunda maria,
Immissi flammis ignium
Non sentiunt incendia,
Vitae priori mortuos
Divina reddunt gratia.

In Benedictus.

A. Sit benedictus Dominus,
Christus, redemptor omnium,
Qui benedictionibus
Sanctum replet collegium.

Ad Crucem.

A. Jesu, nostra medicina,
Qui de mortis nos ruina
Morte crucis liberasti
Et ad vitam revocasti,
Sanctorum praesta precibus
Tuum nobis praesidium,
Ne nos in mundi pelago
Incurramus naufragium.

In Cantemus.

A. Redemptori glorioso
Gloriose decantemus,
Sanctorum festum omnium
Celebrantes honoremus.

In Benedicite.

A. Cuncta Dei opera,
Ipsi benedicite,
In sanctorum omnium
Festo hymnum dicite.

In Laudate.

A. In sanctis ejus Dominum
Laudantes rogent populi,
Ut eis locum conferat
Coelestis habitaculi.

Psallentium in Baptisterio.

Una sanctorum omnium
Celebratur solemnitas,
Ut honoretur quilibet
Sanctus, cujus festivitas
Non fit, sed eam praeterit
Nostra impossibilitas.

Mane ad Psallentium.

Antiphonae.

1. In manu sui domini

Nunc sunt sanctorum animae,
Quos non tormenta varia
Tangent mortis acerrimae.

2. Nostris peccatis omnibus,
Deus, pie pater, parce,
Quem dilexerunt principes
Patrum, sancti patriarchae.

3. Sponsae regis angelum,
Verae vitis propagines,
In odorem unguentorum
Concurrunt sponsi virgines,
Mundae mundum servant tho-
rum,
Vitant carnis voragines.

4. Sancti loqui non trepidant
Coram regis praesentia,
Quos amor Christi fecerat
Audaces cum constantia.

5. Jacent sanctorum corpora
Pacis sepulta requie,
Ipsorum semper nomina
Vivent vita memoriae.

6. Sanctos suos Dominus
Induit fortitudine
Et praecinxit virtutibus
Hos in omni certamine.

7. Ad Christum, fontem luminis,
Sancti de luce vigilant.
Qui fidei et operum
Splendore clari rutilant.

8. Cuncti fideles populi
Deo nostro jubilate,
Servite in laetitia,
Omnes sanctos honorate.

9. Omnes rogemus omnium
Sanctorum multitudinem,
Ut nobis in molestiis
Implorent fortitudinem.

10. Sit apud nos memoria
Sanctorum venerabilis,
Ut nobis sanctus quilibet
Reddatur exaudibilis.

11. Apostolorum merita

Nos defendant in hac vita
Ab hostium insidiis,
Dent coeli frui gaudiis.

12. Te rubricatus martyrum,
Christe, laudat exercitus,
Qui variis suppliciis
Pro te fuit expositus.

Post Kyrie.

A. In sanctorum memoria
Honor Christo et gloria,
Sit hymnus sanctis omnibus
Cum ipso exsultantibus.