14. In Vigiliis beatae Luciae,
virginis et martyris.

Ad Vesperum.
Lucernarium.

R. Virgo Lucia, gratiae
Luce lucens et gloriae,
Ora Christum attentius
Pro nobis et frequentius,

V. Ut peccati caligine
Pulsa fruamur lumine
Christo sole justitiae
Coeli rege militiae.

In Choro.

A. Clemens virgo, martyr pia,
Caecis lumen da, Lucia,
Te cunctis reverentibus
Tuis beatis precibus,
Infirmos sana oculos
Pietatis collirio,
Christi defende famulos
A peccati contagio.

Cum Infantibus.

R. Celebremus solemniter
Omnes vocibus sonoris
Festum Luciae virginis,
Sociatae sanctis choris,
Quae nunc cum sponso residet,
Non ut stultae, quae sunt foris ;

V. Prudens virgo juvencula

Ad Christum sponsum properat,
Ne recludatur janua,
Si introire differat.

A. In amore fervens Dei
Zelat zelatrix fidei,
Pro Christo vitam ponere
Magis quam mundo vivere.

A. Virgo haec immaculata,
Deo placens, Deo grata,
Est in coelis coronata,
Summo regi sociata.

In Magnificat.

A. Magnificet ecclesia

Sponsum Luciae virginis,
Qui pro salute hominum
Naturam sumens hominis
De inferni voragine
Suo nos duxit sanguine.

Psallentium in Baptisterio.

Syracusana civitas,
Felix felici germine,
Redde grates altissimo
Qui de amaritudine

Mundi Luciam separat
Et locat coeli culmine,
Ubi optata fruitur
Sui sponsi dulcedine.

Ad Vigilias.

R. Laetare, urbs Catania,
Agatha tuo germine,
Et, Syracusa, Lucia
Gaude tua propagine,
Quae sunt pro Christo martyres
In virginali agmine.

V. O martyrum et virginum
Quam beata collegia,
In quibus rosae rubeae
Et candida sunt lilia.

A. Ut columba sine felle
Fuit mens hujus puellae,
Quae dat Christo suum velle
Data sibi sua pelle.

R. Mater Luciae virginis,

Languens pro fluxu sanguinis,
Fide sanatur filiae
Virtute regis gloriae
Et sibi suffragantibus
Agathae sanctae precibus.

V. Sanctas Christus mirificat
Insignibus miraculis,
Quas collocat feliciter
Aeternis habitaculis.

A. Non cum stultis virginibus
Mansit haec clausa janua,
Sed patriam ingreditur
Cum corona perpetua.

E. Est de quinque virginibus
Lucia haec prudentibus,
Quae nuptiis perpetuis
Gaudens, non vasis vacuis,
Cum sponso nunc reficitur
Christo, qui nunquam moritur ;

V. Non in mundo sponsus talis
Reperitur, iste qualis,
Pulcher, prudens et regalis,
Dives, cunctis liberalis.

A. Ora, Lucia lucida,

Christum, ut mente nitida
Vitantes cuncta sordida
Nos aula locet fulgida.

Psallentium.

Virgo adolescentula
Christum dilexit sedula,
Quam nunc fovet amplexibus
Ipse supernis sedibus.

Aliud.

Lucia virgo sequitur
Cum cantico laetitiae
Agnum, quocunque ierit,
Habens palmam victoriae.

R A Christo non poterat
Poenis separari,
Lucia, quem noverat
Sponsum sine pari
Et quem praedilexerat
Zelo siugulari.
V. Praedilectam praedilectus
Et ex milibus electus
Luciam sponsam eligit,
Quem prae cunctis haec diligit.

Psallentium.

Spreto thoro maritali,
Contempta sorde carnali
Virgo ad sponsum properat,
Quem immortalem noverat.

Post Kyrie.

Decoram habens faciem,
Virgo, rex tuam speciem
Concupiscens desiderat,
Qui pulcher te zelaverat.

Ad Matutinum.
Post hymnum.
R. Lucia et Eutitia
Pie mater et filia
Cuncta, quae habent propria,
Donant Christi pauperibus,
Condentes horum manibus
Thesaurum in coelestibus;

V. Beatae sunt, quae affluunt
Pietatis visceribus
Et largas elemosynas
Ministrant indigentibus.

Ad Lectiones.
R esponsoria.

1. Virgo ferens martyrium
Est inter spinas lilium,
Quod, cum ab eis pungitur,
Major odor emittitur ;
Sic poenis puncta pluribus
Virgo refundit omnibus
Odorem patientiae
Cum candore munditiae;
V. Haec rosa per martyrium,
Per castitatem lilium.
Fragrat in ecclesia
Virtutum fragrantia.

2. Tam gravi fixa pondere
Divino fuit opere,
Quae se in Christo fixerat,
Quod moveri non poterat
Humana fortitudine
Neque boum conamine;

V. Haec Lucia, generosa
Mente, carne speciosa,
Est in coelis exaltata
Et a Christo coronata.

In Benedictus.

A. Sit benedictus Dominus,
In poenis qui fortificat
Luciani suam martyrem
Et in coelo magnificat.

Ad Crucem.

A. Virgo pro Christi nomine
Pugnat, cujus juvamine
Consequitur victoriam,
Ad crucifixi gloriam
Coelestem intrans patriam.

In Cantemus.

A. Cantet laudes fidelium
Plebs redemptori omnium,
Qui dat Luciae solium
Coeleste per martyrium.

In Benedicite.

A. In hujus festo virginis
Deum benedicite
Et, ejus mira opera,
Laadem sibi dicite.

In Laudate.

A. Laudet Christum ecclesia
In ejus potentatibus,
Qui Luciam associat
In regno cum virginibus.

Psallentium in Baptisterio.

O virgo Syracusana,

Mentes nostras clemens sana,

Da, spernamus ut mundana

Et vitemus cuncta vana

Deponentes veterana,

Fac in vitae nos membrana

Scriptos frui dulci manna.

Mane ad Psallentium.
Antiphonae.

1. Haec variis virtutibus
Amicta velut vestibus
Virginalem servans thorum
Placuit regi coetorum.

2. Fideles Deo jubilent
Et laudibus invigilent,
Qui Luciam pugnatricem
Fortem sexu fragili
Atque reddidit victricem
Triumpho mirabili.

3. Christus Luciam virginem
Induit fortitudinem,
Indutam nunc regalibus
Aula coelesti vestibus.

4. Virtutibus quae rutilat
Virgo de luce vigilat,
Cujus festum veneremur
Et in ipso collaetemur.

5. Constans et firma, patiens
In persecutionibus
Virgo Lucia exstitit,
Sanctis adjuta precibus.

6. Licet tyrannus saeviat
Et in poenis deficiat,
Virgo semper immobilis
Perseverat et stabilis.

7. Haec non minis reducitur,
Non tormentis concutitur,
Quae in dilecto figitur.

8. Hujus corpus prosternitur,
Mens ad Deum erigitur,
Martyr coelum ingreditur,
Supernis laeta fruitur.

9. In hujus gula virginis
Gladius infigitur,
Haec sumpto Christi corpore
Mox coelum ingreditur.

10. In martyrum consortio
Et virginum collegio
Coronatur aureola
Lucia spernens idola.

11. Inclita urbs Catania
Per Agatham honoratur,
Syracusaiia civitas
Per Luciam sublimatur.

Post Kyrie.

A. Est intus cum prudentibus
Cum accensis lampadibus
Lucia, non cum fatuis
Foras cum vasis vacuis.