COLLATIO LV.

(Vers. 7.). Expedit vobis, ut ego vadam.

i. Ideo expedit, quia vado ad iter expediendum, vado ad hospitium praeparandum, vado ad negotium procurandum.

Vado ad iter expediendum: de quo dictum est Michaeae secundo : " Ascendet pandens iter ante eos ". - Vado ad hospitium praeparandum: unde Ioannis decimo quarto: " Vado, vobis parare locum ". - Vado ad negotium procurandum: unde hic: Expedit vobis, ut ego vadam. Si enim non abiero, Paracletus non veniet ad vos: si autem abiero, mittam eum ad vos.

2. Ecce, ad quid vado, sed discite, qualiter vado. Vado enim mundum relinquendo: Ioannis decimo sexto : " Relinquo mundum et vado ad Patrem ". - Vado virtutis exempla praebendo; ego enim sum ille pastor, de quo Ioannis decimo: "Cum proprias oves emiserit, ante eas vadit, et oves illam sequantur ". - Vado tormenta passionis sustinendo: de quo dictum est Petro Ioannis decimo tertio: " Quo ego vado, tu non potes me sequi modo; sequeris autem postea ".

Sic enim itur ad regnum relinquendo mundum, operando bonum et sustinendo malum.