COLLATIO LX.

(Vers. 24.). Petite, et accipietis, ut gaudium vestrum plenum sit.

1. In verbis istis exhortans nos Dominus ad petendum , duo facit: promittit exauditionem, cum dicit: Petite, et accipietis

et format petitionem, cum dicit: Petite, et accipietis, ut gaudium vestrum sit plenum. Petite gaudium , sed attendite, cuiusmodi sit petendum. Est enim gaudium mundi, gaudium iusti et gaudium caeli; vel: gaudium temporale, gaudium spirituale, gaudium aeternale: sive: gaudium temporis, gaudium pectoris et gaudium aeternitatis.

2. Gaudium primum, scilicet gaudium temporale, non est petendum vel appetendum, quia vanum ; Ecclesiastae secundo : " Risum reputavi errorem, et gaudio dixi, quid frustra deciperis "?

Quia mixtum; Proverbiorum decimo quarto: " Risus dolore miscebitur, et extrema gaudii luctus occupat.".

Quia momentaneum; Iob vigesimo: " Gaudium hypocritae ad instar puncti "; et Iob vigesimo primo : " Tenent tympanum et citharam et gaudent ad sonitum organi; ducunt in bonis dies suos et in puncto ad inferna descendunt".

3. Gaudium secundum, scilicet spirituale, appetendum est et est triplex. Gaudet enim homo spiritualis pro evasione periculorum, id est peccatorum: Baruch quarto : " Emisi vos cum luctu et ploratu: reducet autem vos Dominus cum gaudio ": loquitur Ierusalem in figura Ecclesiae ad peccatores.

Gaudet etiam pro experientia beneficiorum: Habacuc tertio: " Ego autem in Domino gaudebo ", id est in experientia bonitatis divinae; " et exsultabo in Deo Iesu meo"; quasi dicat: cum " ficus non florebit, et non erit germen in vineis " etc., cum scilicet non erit exterius consolatio, erit mihi interius in Domino exsultatio.

Gaudet etiam pro exspectatione praemiorum: Matthaei quinto , Lucae sexto: " Gaudete et exsultate, quoniam merces vestra copiosa est in caelis " etc.

4. Gaudium tertium, quod est aeternale, est postulandum et desiderandum, quia verum. Est enim gaudium cordis: nec gaudet vere, nisi qui gaudet in corde: Ecclesiastici trigesimo : " Non est oblectamentum super cordis gaudium ". Tale est gaudium caeli; Ioannis decimo sexto: " Videbo vos, et gaudebit cor vestrum ".

Quia plenum: Ioannis decimo sexto: " Petite, et accipietis, ut gaudium vestrum sit plenum "; et eodem: " Tristitia vestra vertetur in gaudium ".

5. Nota, quod tunc omnia erunt gaudium, quando " tristitia vertetur in gaudium "; ideo dicitur Ioannis decimo quinto : " Haec locutus sum vobis, ut gaudium meum in vobis sit, et gaudium vestrum impleatur "; et propter plenitudinem gaudii dicitur servo fideli,

Matthaei vigesimo quinto, non: accipe gandium, sed: " infra in gaudium Domini tui ".

Quia aeternum; Ioannis decimo sexto: "Gaudium vestrum nemo tollet a vobis "; et Isaiae sexagesimo quinto: " Gaudebitis et exsultabitis usque in sempiternum ".

Capitulum XVII. Haec locutus est Iesus .