4. De sancta Amia.

Ad Missam.

Ingressus.

Mariae tabernaculum,
Anna, defende populum,
Ut peccatorum scrupulum
Vitemus et periculum ;
Esto nobis umbraculum
Commissorum piaculum,
Da coeli habitaculum
Ad praemiorum cumulum.

Psalmellus.

Joachim et uxor ejus,
Justi ambo ante Deum,
Praebent soli justitiae
Hospitium virgineum,
Mariam suam filiam,
Palatium eburneum ;
V. Quod Christus novem mensibus
Inhabitat a gentibus
Desideratus omnibus.

In Alleluja.

Anna nimis honoranda
Et a cunctis veneranda,
Quae reginam concepisti,
Matrem nostri Jesu Christi,
Exora hunc cum filia,
Ut nos locet in patria.

Post Evangelium.

Exaltat Deus Joachim
Singulari dignitate,

Avum sibi praeeligens
Redimitum sanctitate,
Qui matrem Christi generat
Excellentem puritate.

Offerenda.

Accepta Christo munera,
Regnanti super sidera,
Oblatus cruce vulnera
Qui passus est mortifera,
Sanctae coetus ecclesiae
Offerat omnis hodie
In festo suae aviae,
Matris virginis Mariae,
Quae regno gaudent gloriae.

Confractio.

Conjuges Anna, Joachim,
Parentes nostrae dominae,
Servant mandata Domini
Sic cum sollicitudine,
Quod reprehendi nequeunt
Justi ab ullo homine.

Transitorium.

Corpus Christi, de virgine
Natum de Annae germine,
Recipitur ab homine
Pro salutis juvamine,
Quo et Annae precamine
Purgemur omni crimine.