8. De sancto Mauritio.
Ad Missam.

Ingressus.
Ingressus est Maurilius
Aulam supernae patriae,
In qua Christus cum gaudic
Recepit ipsum hodie,
Qui super ejus posuit
Caput coronam gloriae.

Psalmellus.

Fidelis verbi Domini
Dispensator, Maurilius,
Aselli sessor humilis,
Dispensat hoc attentius,
Perlustrat sic et visitat
Infirmos et ecclesias,
Verbum salutis praedicans
Contra hostis insidias.
V. Mirabilem se Dominus
Ostendit in Maurilio,
Dum fur asellum rapiens
Est raptus a daemonio.

In Alleluja.

Sanctus praesul Maurilius
Ascendit coelum hodie,
In quo laetus perfruitur
Vita perennis gloriae.

Post Evangelium.

Confessor sancte, subveni,
Maurili, tuis famulis,
Libera sanctis precibus
A cunctis nos periculis,
Ora Christum, ut nos locet
Aeternis habitaculis.

Offerenda.

Se obtulit Maurilius
Deo viventem hostiam
Per castigati corporis
Rigorem et duritiam,
Qui sibi dedit hodie
Coelestis vitae gloriam.

Confractio.

Fit modo Christi corporis
Sacramentalis fractio,
Signato non infligitur
Ulla tamen divisio,
Cujus in cruce mortuos
Salvat dira passio,
Concelebrata saepius
A praesule Maurilio.

Transitorium.

Corpus venerabile
Christi Dei et hominis,
Quod concepit uterus
Sacrae Mariae virginis,

Nunc sacerdos recipit
Verum, pro toto populo
Crucifixum, mortuum,
Clausum, surgens de tumulo,
Quod sumpsit Maurilius
Cum digna reverentia.