12. De sancto Eustachio.

Ad Missam,

Ingressus.

In pugna miles strenuus
Adeptus victoriam,
Imperatoris superans
Per fidem perfidiam,
Ingressus est Eustachius
Paradisi patriam:
Qui cum palma martyrii
Gaudiis perennibus
Cum conjuge ac filiis
Gaudet in coelestibus.

Psalmellus.

Ignosce, Jesu, populo
Suis peccatis tremulo
Et, quos crucis patibulo
De inferni voragine
Duxisti tuo sanguine,
Hos loca coeli culmine.
V. O Eustachi, martyr Christi,
Pro quo mortem pertulisti,
Exora ipsum jugiter,
Det nobis, ut feliciter
Regnemus et perenniter.

In Alleluja.

Sanctus martyr Eustachius,
Christi miles egregius,
Per viam patientiae
Venit ad locum gloriae.

Post Evangelium.

Filiorum Eustachii

O quam felix germanitas,

Quos faciunt consocios

Parentum Christi caritas,
Una fides et passio,
Coronae pretiositas;
Horum beatis precibus
Detur nobis felicitas
Coelestis habitaculi,
Ubi omnis jucunditas.

Offerenda.

Verus martyr Eustachius
In accensi bovis ara
Sacrificatur hostia,
Clemens, pia, Deo cara;
Cujus est dulce praemium,
Quamvis passio amara.

Confractio.

Hoc verum corpus Domini
In tres partes dividitur,
Quod in earum qualibet
Totum vere asseritur;
Est gratiarum actio
Prima pro jam regnantibus,
Una purgandos relevat
Est una pro viantibus ;
Cum primis est Eustachius
In gloria consocius.

Transitorium.

Pro nobis factus hostia
Jesus noster salutaris,
Ad patrem transit filius
Immolatus sacris aris,
Coronavit Eustachium
Hic rex coeli, terrae, maris.