70. De sancto Sixto.

In 1. Vesperis.
Antiphonae.

1. In sanctis mirabilem,

Pueri, laudate
Deum, ut det stabilem

Vitam, postulate.
2. Martyrum victoriam

Laudent omnes gentes,

Ad illorum gloriam,
Christe, duc canentes.

3. Voce, voto sanctum Sixtum
Cum suis sodalibus,
Corde toto lauda Christum,
Ut iungaris talibus.

4. Lauda Deum, qui sanavit
Ex corde contritos,

Dura hos sanctos liberavit

Carne praepeditos.
5. Eia, lauda et exsulta,

O aula caelestis,
En, sanctorum merces multa,

Rex tuus est testis.

Ad Magnificat.

A. Vox matris ecclesiae

Solito sit suavior,
Dies plena gratiae

Adest luce clarior,
In qua praesul inclitus

Et Martyr insignis
Coronatur caelitus,

Iunctus Deo dignis,
Ergo, o beate beatorum,
Esto memor memorum tuorum.

Ad Matutinum.
Invitaorium.

Vitem veram, vitam meram
Dantem suis testibus,

Adoremus et laudemus
Conformes caelestibus.

In 1. Nocturno.
Antiphonae.

1. Rosa de spinis nascitur,

Dum Sixtus ex gentilibus
Christicola efficitur,

Miris fragrans virtutibus.
2. Urbis Romae papa factus
Ut sidus resplenduit,
In adversis nunquam fractus
Vir totus apparuit.
3. Rosa rubens rubricatur
Roseo cruore,
Dum vir sanctus decollatur
Pro Christi amore.

Responsoria.

1. Sanctus iste, pie Christe,
Fide fortis, nihil mortis
Horruit supplicium,

Stat pro lege et pro grege
Tamquam murus, sic securus
Per te vincens omnia,
V. Exsultat de suppliciis

Sicut de deliciis.
2. Ignis urens, Caesar furens
Virum iustum spe robustum

Potenter aggreditur,
Modo ridet, modo stridet,
Spondet opes et honores,
Sed nequaquam flectitur,
V. Torret per innumera
Tormentorum genera.
3. Dulce granum moritur
Per manus carnificum,
Sed statim renascitur

Ingens et magnificum,
Dat odorem et saporem
In terris mirificum,
V. Scandit Sixtus impermixtus
Ad regnum deificum.

In 2. Nocturno.

Antiphonae.

1. Cum binis diaconibus
Sixtus iugulatur,
Post quos martyr eximius
Laurentius assatur.
2. Rubicundi qui sunt isti
Et unde venerunt?
Hi sunt, qui pro lege Christi
Sanguinem fuderunt.
3. Vere, Christe, sanguis iste
Tuorum fidelium
Digne dignis fulget signis
In coetu fidelium.

Responsoria.

1. Planxit grex ecclesiae
Pastorem lupis datum,
Sed ovans laudat hodie
In caelis sublimatum,
Per Christum coronatum.

V. O vere ter sanctum
Quaterque beatum.

2. Datur porcis margarita,
Cum morte multatur ita
Paganorum manibus,
Vir beatus, Deo gratus,
Laniatur, trucidatur
Impuris a canibus.
V. Heu, caput orbis inclitum
Efficitur spectaculum,

3. Sancte Sixte, martyr Christi,
Vas virtutum tu fuisti,
Vas lucis et gratiae,
Vas, quod Deus fabricavit
Et in caelis collocavit,
Vas immensae gloriae;
V. Tu per vitae poculum
Debriasti saeculum,
O decus ecclesiae.

In 3. Nocturno.
Antiphonae.

1. O quam mira, quam praeclara
Sancti Sixti praemia,
Sic sunt dira et amara
Decii supplicia.

2. Pausat miles strenuus
In regno sempiterno,
Stridet Caesar impius
Ardens in inferno.

3. Iusta indignatio,

Quod tortor cruciatur,
Sic felix mutatio,

Quod tortus consolatur.

Responsoria.

1. Martis aedem, immo sedem
Satanae destruxit,
In quo vide, quod in fide
Velut sidus luxit,
V. Virtutum flores et colores
De fonte vitae suxit.

2. Ante Dei filium
Florebit sicut lilium

Iustitiae amator,
Dans suae familiae
Mensuram in tempore
Ut prudens dispensator.
V. Vere, Sixte, tu es iste,
Qui cuncta tribuisti
Pro amore Christi.

3. Grandi privilegio

Sixtus decoratur,
De quo caeli regio

Vernans illustratur,
Per te, Sixte, Laurentius,
Martyr praeclarissimus,

Christo destinatur ;
V. O patrone Sixte bone,
Funde preces pro devoto

Tibi nunc collegio.

In Laudibus.
Antiphonae.

1. Vir beatus rursum natus
Gaudet in domo Dei,
Cernens, totum quod dat motum
Universae rei.

2. Introivit hodie

Papa Romanorum
Et pugil ecclesiae
In sancta sanctorum.

3. Quod sitivit hic in via
Athleta mirabilis,
Quaerit manu morte pia,
Est ergo laudabilis.

4. O amator hominum,
Sixte, Dei care,
Prece placa Dominum,
Bene nosti quare.

5. Laudate regem gloriae,

Qui aufert auro scoriam,
Cum per palmam victoriae
Sixto confert gloriam.

Ad Benedictus.

A. Benedictus rex coetorum,
Te commendat vox sanctorum

Iubilando dulciter,
Tibi omnis creatura
Servit servans sua iura,

Homo solus aliter ;
Non sic currit chorus iste,
Sed te duce, sancte Sixte,

Christum quaerat iugiter.

In 2. Vesperis.
Ad Magnificat.
A. Miles fortis saevae mortis
Poenam spernens, vitam cernens

In superna patria,
Scandit mundus, rubicundus
Pugil iste tuus, Christe,
Ad sanctorum atria:
O patrone Sixte bone.
Fac nos ire et venire
Ad aeterna gaudia.