APPENDIX.

Annotatio 4.

Dicitur Filius Dei lux propter quinque. Quia maxime se communicat et etiam maxime se diffundit , unde " et in tenebris lucet "; Dionysius: "Imago est bonitatis illius ".

Quia omnia existentia ornat: Genesis primo: " Fiat lux "; Damascenus: "Ibi incipit ornatus mundi et decor "; similiter et lumen intelligibile.

Quia omnia viventia format, ut patet in floribus et plantis: propter hoc dicitur lumen vitae.

Quia animalia laetificat, ut patet in avibus, aurora rutilante, quia spiritus luminosae naturae congaudet suo simili et delectatur in coniunctione convenientis: Ecclesiastae undecimo : "Dulce lumen et delectabile est oculis videre solem "; Tobiae quinto: " Quale gaudium mihi erit, quia in tenebris sedeo et lumen caeli non video "?

Quia volentia illuminari illuminat, suos splendores immittens: Isaiae quinquagesimo octavo: "Implebit animam tuam splendoribus".