91. De sancta Ursula.

In 1. Vesperis.

Antiphonae.

1. Festum beatae Ursulae
De stirpe natae regia
Ecclesiae venerantur,
Per quam multae iuvenculae
Ex nobili prosapia

Ad Christum adunantur.
2. Regni terreni penitus

Contemptis pompis omnibus
Haec Christo dedicatur,

Sed doni missi caelitus
Crebris perfusa imbribus
Alteri desponsatur.
3. Britonum regis filia
Anglorum regis filio
Insigni est promissa,
Sed virginum collegia
Huiusmodi conubio
A Deo sunt provisa.
4. Sicque undena milia

Undenis sumptis classibus
Intrant mare propere,

Sed multa post praeludia
Relictis suis navibus
Romam pergunt prospere.

5. Hos et papa Britannicus
Divina fretus formula
Suscepit reverenter,
Quos totus ut Seraphicus
Spreta papali infula
Secutus est gaudenter.

Ad Magnificat.

A. O increata bonitas,
O virginalis puritas,

Fac nos digne venerari
Te agnum sine macula,
Quem sancta sequens Ursula

Tecum habet quietari,
Una cum eius agmine
Magnificans te Domine.

Ad Matutinum.
Invitetorium.

Regi summo numinum

Latria tribuatur,
In quo solo virginum

Haec turba gloriatur.

In 1. Nocturno.
Antiphonae.

1. Hi sunt flores purpurei
Ubique redolentes,
In summi ripa alvei

Hunc aestum non timentes.
2. Excelsi regis filio

Proceres ordinantur,
Qui virginum collegio
Purius adunantur.

3. Non timent sancti milia
Populi saevientis,
Cum sit in eis gratia
Domini protegentis.

Responsoria.
1. Immenso regi Ursula

Haec sponsa dedicatur,

Ut fundens lumen facula
Tota sic inflammatur,

Puritatisque normula
In ipsa declaratur,
V. Pulchra, prudens infantula,

Christi formata regula,
Ubique divulgatur.

2. Diffusa fama gratiae
Puellae venustatis,
Ad regem venit Angliae
Hic rumor probitatis,
Ut fiant, petit, nuptiae
Filio dignitatis ;
V. Mittit regi Britanniae,
Patri tam gratae filiae,
Rex mirae feritatis.
3. Docta divo miraculo
Regis spopondit baiulo,

Quod petit, se facturam,
Dum se perfundat rivulo
Undae baptismi, annulo
Se dicit consensuram;
V. Undeno petit cumulo
Se virginumque naulo
Milleno vallaturam.

In 2. Nocturno.

Antiphonae.

1. Hi caeli tabernacula
Intrant per iustitiam,
Qui cordis sine macula
Continent munditiam.
2. Mira dictavit Dominus
In sanctis suis terrae,
Conservans eos protinus
A malis saevae guerrae.
3. Haec undenorum milium
Casta generatio
Est Dominum quaerentium,
Cui benedictio.

Responsoria.

1. Relatu facto virginis
Rex tota cum familia

Iugo se subdit numinis
Fidei cum laetitia,

Vocatio fit agminis,
Parantur et navigia;
V. Dum latio fit faminis,

Principes alti nominis
Haec adeunt collegia.

2. Pontifices quam plurimi
Iunguntur his virginibus,
Multique magnanimi

Relictis suis domibus
Naves intrant castissimi
Beatis cum agminibus,
V. Undequaque clarissimi
Concurrunt et doctissimi
Altis spretis nominibus.
3. Acto bello pacifico
Hi monitu angelico

Simul convenerunt,
Cursu relicto classico
Pedestri qui viatico
Romam perrexerunt
V. Et spiritu vivifico
A papaque Cyriaco
Excepti exstiterunt.

In 3. Nocturno.
Antiphonae.

1. Exsultantes in Domino
Hos iustos veneremus,
Ut sic, quod decet omnino,
Rectos corde laudemus.
2. Super iustos respiciunt
Oculi deitatis
Et a feris custodiunt
Haec ossa puritatis.
3. Sanctis caesis virginibus
Mox Huri conturbantur
Et a caeli concivibus
Dei voce fugantur.

Responsoria.

1. Summo linquente praesule
Infulam papalem

Omnes ipso consule

Palmam ad realem
Pro fide tendunt sedule

Summe virtualem ;
V. Sic obtinent iuvenculae
Una cum sponso Ursulae

Coronam laurealem.
2. Huri pravi, infideles
Audientes versipelles

Hunc coetum remeare,
In hos ruunt ut rebelles,
Qui festinant ut crudeles

Insontes sagittare ;
V. Sic pro Christo hi fideles
Non reclamant, sed imbelles

Se optant illis dare.

In Laudibus.
Antiphonae.
1. Quam pulchrum est collegium,
Quod sequitur vestigium,
Quo Dominus regnavit,
Hoc Ursulae praeconium
Testatur et martyrium,
Cum suis quod probavit.

2. Sequuntur inter lilia
Undecim haec milia

Pascentes se in illis,
Devincunt trina proelia
Et respuunt haec vilia,

Psallunt Deo iubilis.
3. Dum sitiunt ad gloriam,
Inveniunt Coloniam,

Ab Huris quae vallatur,
Fundentibus saevitiam
In Christi mox familiam

Haec tota sagittatur.
4. Tres sunt status hic probati,
Igne tamen non cremati

Manentes in camino,
Hic virgines et praelati
Ac proceres copulati

Exsultantes Domino.

5. Undenis his in milibus
In modulis concentibus
Omnes Deum laudate,

Hoc convenit fidelibus,

Sic in beatis omnibus

Ideo laudem date.

Ad Benedictus.

A. O virgo prudens Ursula,
Luce perfundens saecula

Supernae claritatis,
Tui odoris normula
Post te traxisti vascula

Inlernae puritatis,
Ab ima duc nos, Ursula,
Ad summa tabernacula

Aeternae deitatis.

In 2. Vesperis.
Ad Magnificat.
A. Miris dies baec ornatur,
Nam flos albus purpuratur

In Christi rosario,
Fragrans odor exsufflatur,
Quo iuventus adunatur

Regi cursu vario,
Sexus duplex consecratur
Atque vere coronatur
Utroque martyrio,
Sic cum suis laureatur
Ac Ursula praemiatur
Immenso denario.