99.

De sancto Wilhelmo.

In 1. Vesperis.

Antiphonae.

1. Gaude, mater

fecunda liberis,
Quae serpentis

dum caput conteris,
Tuis caelos

alumnis aperis,
Quos victores

coniungis superis.

2. Grates Deo

reddamus seduli,
Qui sublatis

aerumnis saeculi,
Quod non novit

cor, auris, oculi,
Nostro gratis

concessit praesuli.

3. Sub aetate

Guillermus tenera
Blandis parcens

elegit aspera;
Dum virtuti

sic datur opera,
Legem carnis

lex domat altera.

4. Iam gaudere

nolens ad modicum
Adulescens

elongat publicum,
Mundum sibi

cognoscens vitricum
Pompam fugit,

evadit lubricum.

R. In agendis loco ducis
Instans preci verae lucis
Implorabat radios,

Crebro legit in scripturis,
Quibus doctus de futuris

Casus cavet noxios;
Sic praeventus de supernis
His scrutatur in lucernis

Motus mentis proprios.
V. Ut virtutum in affectu

Fetus gestet varios,
Virgas habet in aspectu

Gestus patrum praevios.

Ad Magnificat.

A. Magnifice

divinis laudibus
Vota reddat

exsultans anima,
A quo sumpsit

esse cum viribus,
Reparari

cum drachma decima,
Quam sponsavit

ornans monilibus
Et a paucis

vexit ad plurima,
Cum hanc iunxit

supernis civibus
Veritatis

iam cibans azyma.

Ad Matutinum.
Invitatorium.

Exsurgamus

mente iam sobria,
Nos populus

et oves Domini,
Pro collata

Guillermo gloria
Laudes eius

reddamus nomini.

In 1. Nocturno.
Antiphonae.

1. Christi paret

Guillermus legibus
Actu foris,
intus memoria,

Legem vitae

tenet in moribus,
Et in lingua

lex est clementia.

2. Helisaei

tenens consortium
Iugum spernit

ferre cum impiis,
Ne cum illo

portet repudium,
Qui pro iugis

se privat nuptiis.

3. Cor dilatat

diffusa caritas,
Quo plus iustum

artat afflictio,
Sic Hebraeis

surgit fecunditas,
Quanto maior

urget suppressio.

4. In conspectu

divino dirigit
Gressus mundam

percurrens orbitam,
Viam rectam

consultus eligit
Se per artam

restringens semitam.

5. Elevatur

ad nutum gratiae
Nostra spirans

ad auram aquila,
Escam mentis

contemplans acie
In superna

vitali simila.

6. Ut quiete

cum sponso dormiat,
Nidum sibi

ponit in arduo,
Montem petit,

ut turbam fugiat
Christo iunctus

amplexo mutuo.

Responsoria.

1. Primum sonet

in laude praesulis
Conditoris

honor et gloria,
Qui diffusis

donorum rivulis
Patrem nobis

dedit in patria,
Cuius vita

quam digna titulis,
Certa [nobis]

probant indicia.
V. Signis fulget fide plenus
Clarum gerens ortum, genus

Ex illustri Gallia.

2. Flos erumpens in novella

Planta puri corporis,
Ne laedatur a procella

Circumventi pectoris,
Munda transit carnis cella
Scirpi clausus in fiscella

Foedi fluxus temporis ;
V. Non irrumpit cordis templum,
Quod fit casus in exemplum

Sub elapsu temporis.

3. Ne seducant mundi vana

Cor illustris pueri,
Sensus regit aetas cana,

Fiunt opes oneri,
Iam concepta mente sana
Mox exsurgens in montana

Subit raptu celeri ;

V. Christum sequens pacis via

Nudus fugit cum Helia

Sub umbra iuniperi.

4. Igitur cum ambitu

Spreta mundi cura
Ductus est a spiritu

Sub claustri censura
Commutans cum habitu

Pro summis casura,
Per quod in introitu

Non formidat dura;

V. Spe suspensa muneris
Relevatur oneris
Amore pressura.

In 2. Nocturno.

Antiphonae.

1. Ingressurus

praesul oraculum
Mentis vultum

lavat a maculis,
Fons emanat

iugis per oculum,
Labrum supplet

factum de speculis.
2. Vitam petit,

quam dat dilectio,
Fides et spes,

his pro virtutibus
Quaerit pulsans,

sub hoc ternario
Tribus gaudet

amici panibus.
3. Super aquas

cum Noe fabricat
Arcam cordis

complens in cubitum,
Cum et mundi

contemptum applicat,
Actionis

finalem exitum.

4. Recte laudes

attollunt strenuum,
Quem non flectunt

a recto prospera,
Iuste gaudet

de fructu manuum,
Quem commendant

in portis prospera.

5. Hymnum dicat

praesens collegium,
Christum decent

ipsum praeconia,
Qui assumpsit
in regni solium

Patrem replens
bonis in gloria.

6. Huius odor

ut cedrus Libani
Vitae bonis,

mortis ad exteros,
Qui nunc gaudent

ad sonum organi,
Sed in puncto

ruunt ad inferos.

Responsoria.

1. Summo tendens in amore
Per voti expendium
Gradus coepit a timore,

Sic per septenarium
Scandens gustus in sapore
Firmat aedificium,
V. Factus summi nutu regis
Dux Karoliloci gregis
Pastor et praesidium.

2. Pater sanctus, dum consultum
Tenet solitudinis,
Pascens sibi consepultum
Summi gregem numinis,
Ut det palmes fructummultum,
Purgat mentem, corpus cultum
Iugo reddit ordinis ;
V. Ne clamoris det tumultum
Terra deflens hominis.

3. Servit Iacob pro Rachele

Per vitae septennium,
Urit aestus, sed querelae

Sopit amor taedium,
Ad amplexus traxit Liae,
Gemens cedit fraudi piae

Morem videns patrium.
V. Delicati somnum thori
Turbat lippa, cum labori

Sanctum datur otium.

4. Adhuc latens in deserto
Lucerna sub modio
Dare lucem in aperto
Procedit in medio,

Minat oves gressu certo,
Vagam ponit in lacerto

Reportans ab invio ;
V. Clamat vigil oculus,
Quod sit praesul sedulus

In ovili proprio.

In 3. Nocturno.

Ad Cantica.

A. In canticis labiorum
Laudis sibi laxet lorum

Vox una lactantium,
Rachel plorans consolatur,
Vox in Rama iam mutatur

Maeroris in gaudium.

Responsoria.

1. Hic primatu fungitur

In sede Biturica,

Nec virtutum fabrica
Flatu laudis quatitur,
Supra petram figitur

In virtute modica;
V. Frustra rete iacitur,
Dum pennatis tenditur

In aspectu pedica.
2. Forma gregis populo
Gestis monstrat oculo

Leges aequitatis,
Mel perfectis pabulo,
Lac ad potum parvulo

Sub lingua primatis,
Verbum non adulterat,
Dum dictis aequiperat

Facta probitatis.
V. Iugum tollit umeris,
Quod imponit ceteris

Doctor veritatis.
3. Sub undenae pondus horae

Sudans ab infantia
Sero facto de labore

Vocatur ad praemia;
Denario gaudet pari
Stella fulgens singulari,

Sumpturus duplicia.

V. Nova iusto lux est orta,
Transit luctus, cum absorpta
Mors est in victoria.
4. Pater, precum in hac hora
Sub noctis silentio
Nostra tibi sit decora

Laus, placens devotio ;
Sic concordent mens et ora,
Quod post mortem sine mora
Tu sis nostra portio.
V. Pater sancte, gregem fulci
Ducis prece tuo dulci
Nos fovens in gremio.

In Laudibus.
Super Psalmos.

A. Vocem laudis

affectus iubilo
Deo solvens

te, grex, exhilara,
Melos cordis

cum vocis sibilo
Dat iucundum

psalmum cum cithara.

Ad Benedictus.

A. Benedictus rex invictus,

Dux patris ad bravium,
Qui conflictus vicit ictus

Graves ferens hostium,
Ut vi mortis arma fortis

Frangens, vires sontium,
Nos in portis ditet sortis

Dans supemae gaudium.

Ad Horas.
Ad Primam.

A. Primo mane

iunctus agricolis
Exit vitis

patris ad opera,
Nil commune

gerens cum subdolis
Diem portat

et aestus pondera.

Ad Tertiam.

A. Ter exponit verberi
Reducens itineri

Cum mago iumentum,
Fami, flagris, operi,
Carnis quaerens conteri
Lascivae fermentum.

Ad Sextam.

A. Sexta fiunt tenebrae,

Dum cor inflammatur,

In qua sancto celebre
Nomen occultatur,

Ne quid cernant palpebrae
Quo mens extollatur.

Ad Nonam.

A. Novem regis cubitorum
Lectulus ostenditur,

Cum coetibus angelorum
Novem praesul iungitur

Quo quiete post laborum
Aestus Deo fruitur.

In 2. Vesperis.

Antiphonae.

1. Mane nobiscum vespere,

Ne nox subrepat scelerum,
Dans precum patris munere
Rectos progressus operum.

2. Agat cor vigil spiritu

Vices, dum pausant corpora
Litis sopito strepitu
Pacis succedant tempora.
3. Nullo iam fine clauditur
Vivens iusti memoria,
Cuius ubique spargitur
Lucens signorum gloria.

4. Mors in piscina corruit

Languens sub eius pedibus,
Opem, qua cunctis affluit,
Pastor non neget ovibus.

Ad Magnificat.
A. Magnificat

sponsum in numine
Sponsa, cuius

trina potentia
Trinitatis

splendet imagine,

Trinae dotis

iam fulgens gloria,
Pio cuius

sponsus precamine
Nos ascribat

ad vitae praemia.