382 (2. ) Officium sanctae Crucis.

Ad Matutinum.

1. In passione Domini, Qua datur salus homini, Sit nostrum refrigerium Et cordis desiderium.

2. Portemus in memoria Et poenas et opprobria Christi, coronam spineam, Crucem, clavos et lanceam.

3. Et plagas sacratissimas, Omni laude dignissimas, Acetum, fel, arundinem, Mortis amaritudinem.

4. Haec omnia nos satient Et dulciter inebrient, Nos repleant virtutibus Et gloriosis fructibus.

5. Te crucifixum colimus Et toto corde poscimus, Ut nos sanctorum coetibus Coniungas in caelistibus.

6. Laus, honor Christo vendito Et sine causa prodito, Passo mortem pro populo In aspero patibulo.

Ad Laudes.

1. Christum ducem, Qui per crucem

Redemit nos ab hostibus, Laudet coetus Noster laetus,

Exsultet caelum laudibus.

2. Poena fortis Tuae mortis

Et sanguinis effusio Corda terant, Ut te quaerant,

Iesu, nostra redemptio.

3. Per felices Cicatrices,

Sputa, flagella, verbera, Nobis grata Sint collata Aeterna Christi munera.

4. Nostrum tangat Cor, ut plangat,

Tuorum sanguis vulnerum, In quo toti Simus loti,

Conditor alme siderum.

5. Passionis Tuae donis

Salvator nos inebria, Qua fidelis Dare velis Beata nobis gaudia.

Ad Primam.

1. Tu, qui velatus facie Fuisti, sol iustitiae, Flexis illusus genibus, Caesus quoque verberibus,

2. Te petimus attentius, Ut sis nobis propitius Et per tuam clementiam Perducas nos ad gloriam.

3. Laus, honor Christo vendito.

Ad Tertiam.

1. Hora qui ductus tertia Fuisti ad supplicia, Christe, ferendo umeris Crucem pro nobis miseris,

2. Fac nos sic te diligere, Sanctamque vitam ducere. Ut mereamur requie Frui caelestis patriae.

3. Laus, honor Christo vendito.

Ad Sextam.

1. Crucem pro nobis subiit Et stans in illa sitiit Iesus sacratis manibus Clavis fossus et pedibus.

2. Honor et benedictio Sit crucifixo filio, Qui suo nos supplicio Redemit ab Aegyptio.

3. Laus, honor Christo vendito.

Ad Nonam.

1. Beata Christi passio Sit nostra liberatio, Ut per hanc nobis gaudia Parata sint caelestia.

2. Gloria Christo Domino, Qui pendens in patibulo Clamans emisit spiritum Mundumque salvans perditum.

3. Laus, honor Christo vendito.

Ad Vesperas.

1. Qui pressura Mortis dura

Solvisti nexus criminum, Nos ad pacem Duc veracem,

Iesu, corona virginum.

2. In flagellis Potum fellis

Bibisti amarissime, Pro peccatis Perpetratis,

Aeterne rex altissime.

3. Nostrae genti, Recolenti

Tuae mortis supplicium, Da virtutem Et salutem,

Christe, redemptor omnium.

4. In amara Crucis ara

Fudisti rivos sanguinis, Iesu digne, Rex benigne,

Consors paterni luminis.

5. Sanguis Christi, Qui fuisti

Peremptor hostis callidi, Fac sitire Nos, venire

Ad cenam agni providi.

Ad Completorium.

1. Qui iacuisti mortuus In petra, rex innocuus, Fac nos in te quiescere Semperque laudes reddere.

2. Succurre nobis, Domine, Quos redemisti sanguine, Et duc nos ad suavia Aeternae pacis gaudia.

3. Laus, honor Christo vendito.

Str.

4 bis 6 fehlen hier, finden sich aber spater L; statt dessen:

Qui pax et summa requies, Vexatus fuit pluries, Triginta nummis venditus Et sine causa proditus.

Hic traditur et capitur, Conspuitur et caeditur, Deluditur, exuitur, Velatur et occiditur.

Nach Str. 2 fugt L bei:

Haec horrent caeli sidera, Dum vident, tollunt lumina, Scinduntur templi marmora, Mors viva reddit corpora.