182. (4. ) Versus Ratperti de Festivitate Sancti Galli.

R. Annua, sante Dei, celebramus festa diei, Qua, pater, e terris sidera, Galle, petis.

1. Ecce, dies populis micat haec sanctissima nostris, Quorum tu princeps auctor ad astra meas.

2. Finibus occiduis abiens succedis eois, Dans lucem plebi dogmatis igne tui.

3. Quae tenebrosa fuit fidei nec luce refulsit. Per te caelestem coepit habere diem.

4. Hic ubi nocticolae tenuere cubilia larvae, Ad laudem Christi psallit ubique chorus.

5. Hic fuit, ecce, feris statio gratissima saevis, Nunc sedes sanctis te respuente manet.

6. Tu, pater, huc veniens fers tecum pacis honores, Hinc totam pellens, quidquid adesse nocet.

7. Expuleras nocuum complens dulcedine totum, Quo corpus linquens spiritus astra petit.

8. En, hodie meritam tu post certamina palmam Sumpsisti, Galle; protege nos hodie.

9. Iam super astra nitens famulorum suscipe laudes Qui te devoto nunc iubilant modulo.

10. Aspice propitius venerantes nobile pignus Corpus praeclarum, Galle beate, tuum.

11. Aspice, quae canimus, expurga corda benignus, In rebus cunctis rector adesto tuis.

12. Hinc Domino trino laeti pangamus in uno, Qui nos hunc talem fecit habere patrem.