385. (1. ) In Festivitate Corporis Christi.

Sequentia.

1 a. Lauda, Sion, salvatorem, Lauda ducem et pastorem In hymnis et canticis.

1 b. Quantum potes, tantum aude, Quia maior omni laude, Nec laudare sufficis.

2 a. Laudis thema specialis Panis vivus et vitalis Hodie proponitur,

2 b. Quem in sacrae mensa cenae Turbae fratrum duodenae Datum non ambigitur.

3 a. Sit laus plena, sit sonora, Sit iucunda, sit decora

Mentis iubilatio; Dies enim sollennis agitur, In qua mensae prima recolitur

Huius institutio.

3 b. In hac mensa novi regis Novum pascha novae legis

Phase vetus terminat; Vetustatem novitas, Umbram fugat veritas,

Noctem lux eliminat.

4 a. Quod in cena Christus gessit, Faciendum hoc expressit In sui memoriam,

4 b. Docti sacris institutis Panem vinum in salutis Consecramus hostiam.

5 a. Dogma datur christianis, Quod in carnem transit panis Et vinum in sanguinem;

5 b. Quod non capis, quod non vides, Animosa firmat fides Praeter rerum ordinem.

6 a. Sub diversis speciebus, Signis tantum et non rebus Latent res eximiae,

6 b. Caro cibus, sanguis potus, Manet tamen Christus totus Sub utraque specie.

7 a. A sumente non concisus, Non confractus, non divisus, Integer accipitur;

7 b. Sumit unus, sumunt mille, Quantum isti, tantum ille, Nec sumptus consumitur.

8 a. Sumunt boni, sumunt mali, Sorte tamen inaequali Vitae vel interitus;

8 b. Mors est malis, vita bonis; Vide, paris sumptionis Quam sit dispar exitus.

9 a. Fracto demum sacramento Ne vacilles, sed memento Tantum esse sub fragmento, Quantum toto tegitur.

9 b. Nulla rei fit scissura, Signi tantum fit fractura, Qua nec status nec statura Signati minuitur.

10 a. Ecce, panis angelorum, Factus cibus viatorum, Vere panis filiorum, Non mittendus canibus.

10 b. In figuris praesignatur, Cum Isaac immolatur, Agnus Paschae deputatur, Datur manna patribus.

11 a. Bone pastor, panis vere, Iesu nostri miserere, Tu nos pasce, nos tuere, Tu nos bona fac videre In terra viventium.

11b. Tu qui cuncta scis et vales, Qui nos pascis hic mortales, Tu nos ibi commensales, Coheredes et sodales Fac sanctorum civium.