Acta Francisci Pp. 1097

anno MDXCVII placide obdormivit in Domino. S. Ignatii verus fuit filius et

ita strenue planeque actionem et contemplationem coniunxit. Eius funus

veluti gloriae triumphus fuit, cum populus grato animo eum « Brasiliae Apos-

tolum » acclamaret.

Cum lata haberetur et solida sanctitatis fama, die XXVII mensis Iunii

anno MDCXXVII beatificationis et canonizationis causa incohata est. Anno

MDCCXXXVI de virtutibus heroicis Decretum editum est. Die XXII mensis Iunii

anno MCMLXXX eum in Beatorum catologum rettulit beatus Ioannes Pau-

lus II. Cum ille Ecclesiae Brasiliensis putaretur Pater, eius canonizationi

studuerunt sive Episcopi, sive presbyteri, sive laici illius insignis regionis.

Certiores insuper de eius sanctitatis miraculorumque fama sumus facti, quae

memoriam huius praeclari missionarii comitatur. Quapropter postulationi

Conferentiae Episcoporum Brasiliensium ac nonnullorum aliorum Praesulum

institutionumque ecclesiasticarum amabiliter occurrimus, ut beatus Iosephus

De Anchieta sanctorum albo adscriberetur.

Nos Ipsi, audito Venerabili Fratre Nostro Angelo S.R.E. Cardinale Ama-

to, S.D.B., Praefecto Congregationis de Causis Sanctorum, facultatem feci-

mus ut ad hanc rem procederetur. Parata est Positio super canonizatione

aequipollenti, quam porro comprobarunt Patres Cardinales Episcopique in

Sessione Ordinaria die III mensis Aprilis anno MMXIV.

Itaque, eodem die omnibus mature perpensis et certa scientia, divino

auxilio invocato, sententiam Congregationis de Causis Sanctorum ratam

habuimus et statuimus item ut cultus huic strenuo presbytero nunc et de-

inceps ad totam Ecclesiam deferretur.

Itaque ad Dei gloriam, ad exaltationem fidei catholicae et vitae christia-

nae incrementum, apostolica Nostra ex auctoritate decernimus ut Iosephus

De Anchieta sanctus sit et statuimus ut Sanctorum Catalogo adscribatur ac

pia devotione recoli et inter Sanctos Ecclesiae Universalis invocari debeat.

Volumus tandem ut haec Nostra deliberatio firma sit, immutabilis et

irrevocabilis, atque exoptamus item ut laetanter et gratanter seu ab Eccle-

siae pastoribus seu a fidelibus recipiatur, qui, lumen contemplantes quod

ex virtutibus ac spiritali sapientia sancti Iosephi De Anchieta manat, in

Christum Crucifixum, Filium Dei hominisque Redemptorem amore magis

ac magis flagrent ipsique, mirabilia sanctitatis eius exempla imitantes, in

communione cum sanctis Apostolis Petro et Paulo omnibusque aliis caeli

incolis alacriter in sanctitudinis semita procedere possint.