EPISTOLA VI.

Ad patrem Eliam totius ordinis vicarium generalem.

Vicarium ordinis generalem ad benignitatem hortatur erga subditos, patientiam in iniuriis commendat et clementiam erga lapsos indicit modumque praescribit in peccatis gravibus puniendis et absolvendis, omnibus semper misericordiam inculcans.

Reverendo in Christo patri, fratri Eliae totius ordinis vicario frater Franciscus in Christo salutem.

Frater, det tibi Dominus suam sanctam benedictionem, In omnibus sis patiens et bene dispositus. Si in aliquo a fratribus tuis offenderis, accepta referas Deo. In hoc etiam cognoscam, si es servus Dei, si errantem fratrem misericordia reducas ad Deum, et si graviter errantem amare non desieris. Et si aliquo timore humano id attentare non audeat, pete ab eo, si misericordiam cupiat. Et si aliquis suadente diabolo ceciderit in aliquod grave peccatum, recurrat ad guardianum, ille vero transmittat ad provincialem, qui misericorditer recipiat; et si viderit illum esse contritum, dicat illi: Vade et noli amplius peccare. Vale in Domino.