13. In Transfiguratione Domini.

1. Laetentur in Christo rege
Sion et exsultent filiae.

2 a. In regali Dei nato,
Maiestate declarato,
Se claros exhibeant,

2 b. Qui regnantem in decore
Post eclipsim huius horae
Videre desiderant.

3 a. Haec regnandi prophetia
Dulci canit melodia
De futuro saeculo ;

3 b. Exsul nunc a summo bono,
Qualis sit futurus, homo
In hoc discat speculo.

4 a. Gloriose instauratur
Et a Deo illustratur
Haec transfiguratio ;

4 b. Vestis, locus, tempus, cuncta
Sacramentis sunt fecunda,
Cuncta probat ratio.

5 a. Verum David Salomonem
Post extinctum Absalonem
In throno iam ordinat,

5 b. In quo pater sibi placens
Et serenum iubar clarens
Christi regnum consecrat.

6 a. Pro spe nostra et salute
Ut sol in sua virtute
Lucet septempliciter,

6 b. Christi vultus enitescit,
Immo sane plus clarescit
Sole multiplicius.

7 a. Albet nix in vestimento,
Ex utroque testamento
Ministri conveniunt ;

7 b. His venturum Christum ducem
Duo signant, tres in lucem
Trinitatis prodeunt.

8 a. O beatae viri sortis,

Quibus non gustandae mortis
Crescit repromissio,

8 b. Donec regni venustatem
Cernerent et maiestatem
Hominis in filio.

9 a. In Moyse et Helia

Iesum lex cum prophetia
Messiam glorificant;

9 b. Christus vivens hic viventis,

Alter subdi dormientis

Statu suo indicat.

10 a. Nemo crucem perhorrescat,
Nullus pati pertimescat
Cum divino munere:

10 b. Gloria se sublimandum
Et honore coronandum
Valeat praesumere.

11a. O paternae splendor lucis,
Da in forma tuae crucis
Nobis tecum commori,