217. De ss. Cosma et Damiano.

1 a. Chorus et vox, harmoniae
Novae vita concors piae,
Modulentur in hac die
Vocali concordia.

1 b. Haec est dies celebranda,
Summa laude veneranda
In sanctorum adoranda
Sollemni memoria.

2 a. Christus diem hanc beavit,
Qua patronos coronavit
Et martyrio ditavit
Praesentis ecclesiae.

2 b. Istos habet advocatos,
Quos scit morte laureatos
Et in caelis coronatos
Corona iustitiae.

3 a. Imitentur christiani,

Clerus, plebes et plebani
Cosmae atque Damiani
Miranda vestigia.

3 b. Qui sub flore iuventutis
Petentes ortum salutis
Sacris instant institutis
Praeventi ad gratiam.

4 a. Medicinae artis gnari
Remedio salutari
Consuerunt medicari
Gratis absque praemio.

4 b. Laude florent temporali,
Sed mercede spiritali
Munerantur, triumphali
Gaudentes martyrio.

5 a. In Aegea civitate
Idolorum vanitate
Cedata crudelitate
Coguntur decipere.

5 b. Quorum florem castitatis
Nec vernantis flos aetatis
Nec vis ulla vanitatis
Potuit illudere.

6 a. Flagellati, lapidati,
Sagittati, decollati
Et per multa cruciati
Tormentorum genera.

6 b. Torcularis in pressura

Faex deorsum sed vis pura
In sempiternum mansura
Manavit ad supera.