32. Dominica 2. post octavam Paschae.

1 a. Immutato carnis iure
Universae rex naturae
Iura subit creaturae
Sola ductus gratia.

1b. Res a saeclis non audita:
Deitati fit unita
Caro nostra, mundi vita
Virginali clausula.

2 a. Stella nova novum lumen
Dat, dum spirat virgo numen,
Cui caelum, terra, flumen
Lege cedunt debita.

2 b. Fecundatur caeli rore
Vellus siccum, virga flore,
Castitatis cum tenore
Virgo fit puerpera.

3 a. Praesagitus in scripturis
Mons abscissus non scissuris,
Carnem vestit nostri iuris
Agnus absque macula.

3 b. Rubum sacrans vivax ignis,
Homo Deus, hic mons pinguis,
Certis mundo claret signis
Vitae dans piacula.

4 a. Maiestatis ius divinum

Unda sentit, cum fit vinum,
Gustantem architriclinum
Nova fallunt pocula.

4 b. Panum quinque supplementa
Turba stupet his distenta,
Vix reponens tot fragmenta
In bis sena sportula.

5 a. Lingua mutis reseratur,
Claudis gressus reparatur;
Helisaeus incurvatur,
Caro calet pueri.

5 b. Iam loto Naaman unda
Lepram nescit caro munda,
Redivivi fit iucunda
Martha soror Lazari.

6 a. Ramis via decoratur,
Deam turba protestatur,
Dum Hosanna proclamatur
Salvatori obviam.

6 b. Plebs Iudaea zelo tacta
Deitatis, stupefacta,
Pavens, ne gens fidem nacta
Tota colat Messiam,

7 a. Mortis causa machinatur,
Iudae munus irrogatur,
Turbae Christus demonstra-
tur
Signo pacis osculo.

7 b. Flagris caesus coronatur,
Cruce lusus elevatur,
Perforatur et potatur
Mixto fellis poculo.

8 a. Universae carnis sortem
Vita subit passa mortem,
Lapsam Styge sic cohortem
Evehit ad propria.

8 b. Leo fortis suscitatur,
Magdalena quod testatur,
Cui primum declaratur
Resurgentis gloria.

9 a. Quadraginta post diebus
Attestatus multis rebus
Noster scandit astra Phoebus
Vescens cum discipulis.

9 b. Hinc promissa complens data
Corda replet praeparata,
Lingua stupet gens adfata
Fantibus apostolis.

10 a. Erubescant iam Iudaei,
Caelis regnat caro Dei,
Cuncta merces nostrae spei,
Patris est ad dexteram.

10 b. Tu regnantis o Maria
Mater Christi, vitae via,
Ora natum prece pia,
Ut det nobis veniam

11. Et solutos mole carnis
Pertrahat ab patriam.