227. De sancto Eusebio.

1 a. Arnhem gaudeat ab intra,
Siti circumquaque iuxta
Exstent toti iubili

1 b. De tam nobili collato
Illis praemio, delato
Corpore Eusebii.

2 a. Orthodoxa fide plenus,
Paganismo alienus,
Zeli tactus iaculo,

2 b. Sic moratus est in mora
Sanctitatis omni hora
Abnuendo saeculo.

3 a. Videns eius facultatem
Stipes dabat, libertatem
Malens aeternaliter.

3 b. Confessorum vixit norma
Post triumphat recta forma
Martyrum aequaliter.

4 a. Suo die nationis

Vestit Caesar se leonis
Vellere Aurelius,

4 b. Ut est leo rex ferarum

Dictus, sic creaturarum

Optans dici dominus.

5 a. Iste Romam convocavit,
Herculi turificavit ;
Sectam hanc Eusebius,

5 b. Dei martyr, confutavit,
Christi fidem praedicavit
Omnibus fidelibus,

6 a. Docens paenitentiam,
Pellens idolatriam
Deum adorabat.

6 b. Prosunt sancta dogmata
Pluribus proposita,
Iulium salvabat.

7 a. Miles hic cum sociis
Penditur eculeis,
Nervis flagellatur;

7 b. Huic poenae gaudio,
Cui Dei visio,
Dum fustigabatur.

8 a. Huius sancti latus ustum
Servat angelus inustum ;
Antoninus credidit

8 b. Linguam hinc abscissam esse,

Passus nil potest prodesse,

Quin et laudes reddidit.

9 a. Tunc amicus deitatis

Est mactatus cum plumbatis,
Quem mox caelum rapuit.

9 b. Nunc in terris fulget signis,
Dat vexatis a malignis
Opem, quod El placuit.

10 a. Mutis linguam reseravit,
Claudis gressum reparavit
Dei medicamine.

10 b. Maris undas quietavit,
Mares plures hic servavit
Maris a disturbine.

11a. Cancros atque plures pestes
Sanat, exstant multi testes,
Multis dat remedia.

11 b. Ergo nobis sis, patrone,
Asta, bone, in agone,
Duc nos ad caelestia.