EPISTOLA XII.

Ad sacerdotes totius ordinis.

Commendat quam maximam erga Altaris Sacramentum reverentiam inculcatque sacerdotibus, ut puri et pure conficiant sanctissimum Domini nostri Jesu Christi corpus et sanguinem.

In nomine sanctae trinitatis et summae unitatis, Patris et Filii et Spiritus sancti, amen.

Reverendis et multum diligendis fratribus universis, generali ministro ordinis minorum domino suo et caeteris ministris generalibus, qui post eum erunt, et omnibus ministris et custodibus et sacerdotibus fraternitatis eiusdem, in Christo humilibus, et omnibus simplicibus et obedientibus, primis et novissimis, frater Franciscus, homo vilis et caducus, vester parvus servus, salutem in eo, qui redemit et lavit nos in sanguine suo, dominus Jesus Christus altissimus Filius nomen illi, qui est benedictus in saecula, amen.

Audite, domini, filii et fratres mei, auribus percipite verba mea. Inclinate aures cordis vestri et obedite voci Filii Dei. Servate in toto corde vestro mandata eius, et consilia eius perfecta mente implete. Confitemini ei, quoniam bonus, et exaltate eum in operibus vestris. Tanquam filiis se nobis offert Dominus Deus. Deprecor itaque omnes fratres cum osculo pedum et cum charitate, qua possum, ut omnem reverentiam et omnem honorem, quantumcunque poteritis, exhibeatis corpori et sanguini Domini nostri Jesu Christi, in quo, quae in coelis et quae in terris, sunt pacificata et reconciliata omnipotenti Deo. Rogo etiam in Domino omnes fratres meos, sacerdotes qui sunt et erunt et esse cupiunt Altissimi, quod, quandocunque voluerint missam celebrare, puri et pure faciant cum reverentia verum sacrificium sanctissimi corporis et sanguinis Domini nostri Jesu Christi, sancta intentione et munda, non pro ulla terrena re, neque timore vel amore alicuius hominis, quasi placentes hominibus, sed omnis voluntas, quantum adiuvat gratia Omnipotentis, ad eum dirigatur, et soli ipsi Deo summo tantum placere desideretis, quia ipse solus operatur ibi, sicut sibi placet; quoniam sicut ipse Dominus dicit: "Hoc facite in meam commemorationem"; si quis aliter fecerit, Judas traditor efficitur. Recordamini, fratres sacerdotes, quoniam scriplum est in lege Moysi, quod transgredientes in corporalibus sine ulla miseratione per sententiam Domini moriebantur. Quanto maiora et peiora meretur pati supplicia, qui Filium Dei conculcaverit et sanguinem testamenti pollutum duxerit, in quo sanctificatus est, et spiritui sancto contumeliam fecerit? Despicit enim homo pollutus et conculcat agnum Dei, quoniam, sicut dicit Apostolus, non diiudicans et discernens sanctum panem Christum ab aliis cibariis vel operibus indignis indignus manducat, cum Dominus per Prophetam dicat: " Maledictus homo, qui opus Dei facit negligenter vel fraudulenter. " Et propter sacerdotes, qui nolunt ponere super id cor in veritate, condemnat nos dicens: Maledicam benedictionibus vestris. " Audite, fratres mei: Si beata virgo Maria honoratur, ut dignum est, quia ipsum portavit in sanctissimo utero suo, si beatus Joannes Baptista contremuit et non audebat tangere Domini verticem, si sepulchrum, in quo per aliquod tempus iacuit, sic veneratur, quantum debet esse sanctus et justus et dignus, qui non iam moriturum, sed in aeternum victurum et glorificatum, in quem desiderant angeli prospicere, contrectat manibus, corde et ore sumit et aliis ad sumendum praebet? Videte dignitatem vestram, fratres sacerdotes, "et estote sancti, quia ipse sanctus est. " Et sicut super omnes propter hoc mysterium honoravit vos Dominus Deus, ita et vos propter hoc mysterium diligite eum, reveremini et honorate. Magna miseria et miseranda infirmitas, quando ipsum sic praesentem habetis et aliquid aliud in toto mundo curatis. Totus homo paveat, totus mundus contremiscat et coelum exultet, quando super altare in inanibus sacerdotis est Christus Filius Dei vivi. O admiranda altitudo, o stupenda dignatio, o sublimitas humilis, quod Dominus universitatis, Deus et Dei Filius, sic se humiliat, ut pro nostra salute sub modica panis formula se abscondat ! Videte fratres humilitatem Dei et effundite coram illo corda vestra et humiliamini, ut et vos exaltemini ab eo. Nihil ergo de vobis retineatis vobis, ut totos vos recipiat, qui se vobis exhibet totum. Moneo praeterea et exhortor in Domino, ut in locis, in quibus morantur fratres, una tantum celebretur missa in die secundum formam sanctae romanae ecclesiae. Si vero in loco plures fuerint sacerdotes, sic sit per amorem charitatis alter contentus audita celebratione sacerdotis alterius, quia absentes et praesentes replet, qui eo digni sunt, Dominus noster Jesus Christus. Qui licet in pluribus locis reperiatur, tamen indivisibilis manet et aliqua detrimenta non novit, sed unus verus, sicut ei placet, operatur, cum Domino Deo Patre et Spiritu sancto Paracleto in saecula saeculorum, amen.