Acta Francisci Pp. 1115

IV

Venerabili Dei Servae Ioannulae Franchi Fundatricis Congregationis Sororum Hospitalariarum a Virgine Perdolente Beatorum honores decernuntur.

FRANCISCUS PP.

Ad perpetuam rei memoriam. - « Bonum autem facientes infatigabiles, tempore enim suo metemus non deficientes » ( Gal 6, 9).

Haec verba ex Epistola ad Galatas examussim describunt vitam spirita- lem Venerabilis Servae Dei Ioannulae Franchi, dominae nobilibus virtutibus praeditae, verae heroines caritatis christianae. Etenim ea magnopere scivit praeceptum amoris exponere cum gaudio cordeque aperto, quippe quae pau- peres et aegrotantes constituit se adiuturam esse. Haud quidem dissimilis fuit Iesu, quandoquidem videtur illam quoque dixisse fratribus et sororibus in via occursis « Venite ad me, omnes, qui laboratis et onerati estis, et ego reficiam vos » ( Mt 11, 28).

Nata est Comi die XXIV mensis Iunii anno MDCCCVII, secunda filia familiae quae inter locupletissimas illius orbis annumerabatur. Infantia tranquille in familia acta, studuit decennium apud Collegium Sancti Caroli, ad Sorores Visitandinas Novocomenses pertinens, ex quo excessit duodevicesimum suae vitae annum agens. Ad vitam matrimonialem destinata necnon eo tempore iam ad valores spiritales disposita, haec Serva Dei, post mortem desponsati sui praematuram, ardentius desideravit vires suas impendere in apostolatum catechesis et caritatis. Cum, mortuis parentibus, patrimonium eorundem acceperit, ex ea hereditate pecunias sumpsit quibus studiosius et liberalius dedidit se ministerio infirmorum, praesertim illorum qui detenti in carcere vel domu conclusi fuerunt, necnon pauperrimorum. Quamobrem domum in media urbe Comi comparavit, in vico infami nomine Cortesella sitam. Haec quidem domus facta est refugium omnium qui ab humana consortione erant alienati, aegroti, pauperes, ex carcere liberati, monachae quarum coenobia erant suppressa, mente insani, olim meretrices honestam vitam requirentes, mulieres solitariae sicut textrices et vestificae quibus longam post vitam ad laborem dicatam deerant domus et victus. Die XXVI mensis Septembris anno MDCCCLIII una cum tribus sociis Piae Unioni Sororum Caritatem Ministrantium initium dedit, quae deinde Sororum Hospitalariarum a Beata Maria Virgine Perdolente susceperunt nomen. Missio primaria huius Unionis fuit auxilio