22. In Parasceve Domini.

1. Pater, qui commoda
omnia regis
ubique pariter
cum propria subole,

2. Quam pro nostro
admisso scelere
hodie das in escam
pro omnibus populis.

3. Traditur patrator mundi
per manus miseri Iudae
infidis Iudaeis
ad crucifigendum,

4. Ut nos a morte eripi
valeremus gratias
persolventes.

5. Magnus in orbe sacerdos
hodie immolatur
pro salute mundi.

6. Huius in morte
sol tenebrescit,
infernus ac tellus
seminant lacrimas
cum tremore.

7. Latro ipsum agnovit,
dum penderet in cruce,
dicens: Domine
mei memento;
at Iesus ait: pateant
tibi et in me sperantibus
ianuae paradisi.

8. Qui passurus advenisti
propter nos,
prophetice prompsisti:
ero mors tua, o mors.

9. Teque vinciri
voluisti

nosque a nostris
vinculis eripuisti.

10. Vita in ligno
moritur,

infernus et mors
rugiens spoliatur.

11. Sancti, qui tenebantur
in morte capti,
in voce lacrimabili
clamaverunt: advenisti
redemptor noster,
quem exspectabamus.