24. De sancta Cruce.

Salve crux, salve mundi salvatio, salve.

Arbor ave vitae, fructus vitae viret in te,

Est odor et gustus tuus eximius, pretiosus,

Vitae deliciae sunt in te, vivimus ex te.

Nascitur ex ligno mors, per lignum moritur mors,

Mors moritur per te, nos vita resuscitat in te,

Vivificat vetiti defunctos germine ligni,

Victos per lignum dat per te vincere lignum.

Vicit enim ligno mors, victrix obtinuit nos,

Consuit ex foliis, heu, perizomata nudis,

Ex vitae ligno seclusit traduce ligno,

Mors nos excedit; hanc, crux, tuus esus abegit.

Nos mors evomuit, in te dum vita pependit,

In te, mors mortis, sanguis profluxit erilis.

O lignum vitae, crux, nostra redemptio, salve.

In te. Leviathan est captus, Adam reparatus,

Per te chirographum rescinditur evacuatum;

Pondus dulce ferens peccati pondera deles,

Eden es clavis, mundi tutissima navis,

Carbasus et transtrum, remex antemnaque, clavum,

Es via, dux et piratis erebi dominaris,

Provehis et munis nos, adversantia punis,

In portum ducis, sub abyssum mersa reducis

Scylleosque canes a nostris morsibus arces.

Arbor ave AdminBookmark salva, Deus AdminBookmark nos;

Non tradas morti, quos in cruce vivificasti,

Contra quodque malum crucis exsere, Christe, tropaeum,

Non tibi despecti sint, pro quibus occubuisti,

Et quorum pretium tuus est cruor in cruce fusus,

Sed meminisse velis, quod factus es hostia nobis,

Quod pro vulneribus nostris es vulnera passus.

Antidoto vitae contritos corde medere,

Quod placet, id confer, quidquid tibi displicet, aufer,

Iunge tibi tua membra, sit in te sessio nostra.

Victor mortis, ave; crux, vitae gloria, salve.