25. In Exaltatione s. Crucis.

1 a. Prodeunt vexilla
nunc regis aeterni
praeclara,

1b. Fulgent mysteria
crucis vivificae
sacrata.

2 a. Est in qua

praecellentissima hostia

2 b. Immolata

redemptionis gratia,

3 a. Iam pretiosissima

Christi pendent viscera
in cruce celsa,
tenduntur membra,
manus ac vestigia
clavis confixa.

3 b. Vulneratus lancea
nostra lavit crimina,
sanguis et aqua
profluxerunt,
et mundantur maria,
aer et terra.

4 a. O nimis fulgida
et decora
arbor beata
et ornata
regis purpura.

4 b. Tu digno stipite
es electa
tangere membra
gloriosa
ac sanctissima.

5 a. Super universa ligna
cedrorum celsior sola,
pependit in qua
Dominus, mundi vita.

5 b. David fidelis carmina,
quae cecinit, adimpleta
credimus, regnat
Deus de ligno quia.

6 a. Salve, crux pretiosa,
salve, crux veneranda,
quae Christi es
corpore dicata:

6 b. Tu es, crux veneranda,
tu es, crux adoranda,
digna mundi
portare talenta.

7. O crux gloriosissima,
omnium spes unica,
nostra poscit caterva,
veniam reis dona,
ut gaudeamus per saecla.