26. "Philothei monachi Casinensis in sacrosancto resurrectionis die Sequentia."

1 a. Laudent caeli conditorem,
Laudet terra redemptorem
Mirans eius gloriam ;

1b. Laeta dies sit redemptis,
Lingua promat resurgentis
Domini victoriam.

2 a. Dies namque celebratur,
In qua nostrae praesignatur
Carnis resurrectio ;

2 b. Agnus vicit nunc draconem,
Nunc submersit Pharaonem
Rubri maris sectio.

3 a. Imber abit et recessit,

Hortus noster iam florescit,
Perfluunt aromata;

3 b. Sponsa fulvos inter flores
Christi currit post odores
Concinens alleluia.

4 a. Peccatorum sonent plausus,
Ionas ceti ventre clausus
Hodie proicitur ;

4 b. Philistaeos verus David
Et Goliam superavit,
In quo Satan vincitur.

5 a. Postquam diu tritus sedit,
Bona tandem Iob accepit
Duplicis substantiae;

5 b. Samson urbis tulit postes,
Viro forti cedunt hostes
Caelestis potentiae.

6 a. Nunc Aegyptus spoliatur,
Plebs Hebraea nunc ditatur
Sempiterno munere;

6 b. Hoc tu nobis praestitisti,

Christe Iesu, cum venisti

Iugum nostrum tollere.

7 a. Mortis hamum tunc celasti,
Cum te nobis coaptasti
Carne cinctus lutea;

7 b. Nunc infernum momordisti,
Morte mortem peremisti
Dei cinctus framea.

8 a. Portas aeris confregisti,
Victor, Christe, surrexisti
Pede calcans tartara.

8b. Dulcis Iesu, pastor vere,
Tu nos tecum fac gaudere
In aeterna saecula.