35. In Ascensione Domini.

1. Salve, dies, qua inferna
Spoliavit ad superna
Christus tendens gaudia.

2 a. Christus Iesus nunc ascendit,
Qui pro nobis iam descendit
Nostra sumens vilia.

2 b. Super astra sublimatur,
Non apparet, absentatur
Corporis praesentia.

3 a. Cuncta tamen moderatur,
Cuius patri coaequatur
Honor et potentia.

3 b. Modo victor, modo tutus,
Est in caelis constitutus
Rector super omnia.

4 a. Non est rursum moriturus
Nec per mortem mundaturus
Hominum contagia.

4 b. Semel enim incarnatus,
Semel passus, semel datus
Pro peccatis hostia.

5 a. Nullam refert ultra poenam,
Nam quietem habet plenam
Cum summa laetitia.

5 b. Cum recessit, ita dixit,
Intimavit et infixit
Discipulis talia:

6 a. Iam ad patrem meum ibo,
Sed sciatis, quod redibo,
Veniet paraclitus,

6 b. Qui discretos et loquaces
Et securos et audaces
Faciet vos penitus.

7 a. Super aegros et languentes
Manus vestras imponentes
Sanitatem dabitis,

7 b. Universas res nocentes,
Inimicos et serpentes
Et morbos fugabitis.

8 a. Qui fidelis est futurus
Et cum fide suscepturus
Baptismi remedium,

8 b. A peccatis erit purus
Et cum iustis habiturus
Sempiternum praemium.