36. In Ascensione Domini.

1 a. Iesum sonet laudis melos,
Rex virtutum scandit caelos
Sublimi potentia.

Ib. Totus caeli potentatus
Illi exit laureatus
Summa cum laetitia.

2 a. Iubilant et admirantur,
Laude simul iucundantur
Circa baec magnalia.

2 b. In dulcorem sonant voces,
Distinguunter per cohortes
Astra caeli fulgida.

3. In amorem exardescunt,
Quaerunt sic et obstupescunt
Et respondent, qui cognoscunt
Iesu mirabilia:

4 a. Quis est iste gloriosus
Sua forma, speciosus
Gratuito munere?

4 b. Quid est istud, quo vestitur,
Cur maiestas operitur,
Quae non eget tegmine?

5 a. Haec est vestis illa pia,
Caro sumpta de Maria
Non virili semine.

5 b. Cur est vestis lacerata
Et hinc inde rubricata
Quasi tincta sanguine?

6. Hae sunt plagae, quas portavi,
Hic est sanguis, quem manavi
Moriens pro homine.

7 a. Quis est iste comitatus,
Tam sublimis apparatus,
Quo procedit rex vallatus
Quasi cinctus agmine?

7 b. Hae sunt animae beatae,
De inferno liberatae,
Quae fuerunt captivatae
Pro parentum crimine.

8 a. Ergo cantent in hoc die
Tres caelestes hieraruhiae
Nato virginis Mariae
Per laudum praeconia,

8 b. Qui per mortem hostem stravit
Et infernum spoliavit
Et de morte triumphavit
Resurgens in gloria.

9 a. Sic naturam reparavit
Humanam et exaltavit
Et ruinam restauravit
Aequa dans fastigia.

9 b. Nunc ascendit sic patenter,
Caelos penetrat potenter
Et transcendit excellenter
Omnium cacumina.

10 a. Pater stringit, amplexatur
Unigenitum, testatur,
In quo solo iucundatur,
Cui dedit omnia.

10 b. Iam in dextra patris sedet,
Unde stando mentes replet
Et conformes sibi praebet
Tribuens charismata.

11. Rex benigne, nos conforta,
Semper tibi nos concorda,
In te ipsum nos transporta,
Qui adimples omnia.