41. De sancto Spiritu.

1 a. Amor patris filiique,

Pax amborum, par utrique,
Genitoris genitique
Veni sancte spiritus.

1b. Sint inanes de te pleni,
Nos immites mitis leni,
Consolari tristes veni,
Tu qui es paraclitus.

2a. Sempiterni stilla roris
Et divini ros humoris,
Intus nostrum, nostrum foris,
Fons caelestis, ablue.

2 b. Rivus fontis es paterni
Filiique coaeterni,
Hinc derivans non secerni
Potens fons perpetue.

3 a. Viva vena fontis vivi,
Fontis rivus et fons rivi,
Tu carnalis incentivi
Elevas incendium.

3 b. Qui de patris fonte fluis
Filiique rore pluis,
Seda sitim sisque tuis
Hos et stillicidium.

4 a. Numen es de numine,
Lumen es de lumine,
Flumen es de flumine
Rigans arva mentium.

4 b. Eos es sed perpetuus,
Liquor sed mellifluus,
Rivus sed milleiluus
Mentibus credentium.

5 a. Fontis liquor, fons liquoris,
Roris humor, ros humoris,
Meri mera pax amoris
Patris erga filium.

5 b. Indivisae caritati
Solidaeque firmitati
Generantis generati
Nexus, virtus, medium.

6 a. Es de patre par eidem
Filioque par et idem,
Non hic idem sed hoc idem,
Nos haec verba, nos hancfidem
Docuit ecclesia.

6 b. Ne supremae finis horae
Arguat nos in furore,
Pio patri pio more
Filioque tuo rore
Rigans nos concilia.