45. De sanctissima Trinitate.

1a. In personis pluralitas
Usia fit identitas,
Divinitatis trinitas;

1b. In ipsis est aequalitas,
Permanet summa veritas
Aequalisque divinitas.

2 a. Summi patris potentia
Natique sapientia,
Paracliti clementia

2 b. In omnibus sunt omnia,
Dant cunctis mirabilia
Trinitatis vestigia.

3 a. Divinus ordo superas,
Pondus, mensura, numerus
Rebus relucent omnibus;

3 b. In rebus exstat veritas,
Bonitas est et unitas,
Unum vestitur pluribus.

4 a. Deum veram, unitatem
Contemplemur, veritatem,
Trinitatis mysteria:

4 b. Hic credamus nostro posse,
Non est nostrum loqui, nosse
De tam sancta materia.

5 a. Profitentes unitatem
Exoremus trinitatem,
Ut remittat vitia

5 b. Et post huius vitae cursum
Donet nobis esse sursum
In aeterna gloria.