49. In Die Corporis Christi.

1 a. In honore Iesu Christi
Laus praeclara detur isti
Festo cum laetitia.

1b. Iesu bone, quos novisti
Tuos, cruce redemisti
Hostis a malitia.

2 a. Prima causa, Deus, rerum,
Verbum patris semper verum,
Totus in potentia,

2 b. Non localis regnans tantus,
Angelorum chorus "Sanctus"
Exaudit frequentia.

3 a. Luce clarus vult aequari
Summo casu, condemnari
Meretur complicibus.

3 b. Formam factus ad divinam

Homo sentit et ruinam

Vetitis radicibus.

4 a. Ecce, virtus deitatis
Ardet, ecce, caritatis;
Mirando commercio

4 b. Rosa florum impraegnatur,
Verbum patris incarnatur,
Resurgit plasmatio.

5 a. Corpus Christi panis vivus,
Sanguis eius fons et rivus,
Salutis progressio ;

5 b. Cibus datus peccatori
Se maritat, dum sapori
Dolor et confessio.

6 a. Post emendam gratulatur,
Mentis menda cancellatur,
Inardescit spiritus ;

6 b. Potu crucis sanguinatur,
Totus intra dulcoratur,
Exsultat divinitus.

7 a. Felix homo, praeparare
Deum semper collaudare
Pro tali convivio,

7 b. Quo salvaris dira morte,
Revocatus dura sorte
Crucis in patibulo.

8 a. Est origo tua lutum,
Finis et foetoris sputum,
Haec sint in memoria;

8b. Corde trito Deum colo,
Corpus Christi digne mole,
Ne priveris gloria.

9 a. Epulemur compotantes,
Ipsi nos diiudicantes,
Ne fiat iudicium,

9 b. In secundo quod adventu
Damnandorum pro conventu
Exit ad supplicium.

10a. Animarum esus vere,
Fac nos tibi commanere
Caeli reclusorio.

10 b. Virgo mater hoc precetur,
Ne sanctorum denegetur
Nobis adiutorio.