57. Vita Domini.

1 a. Puer nobis nascitur,
Filius conceditur,
Gaudeamus hodie

1b. In praesaepe ponitur
Pannisque involvitur,
Vagit rex potentiae.

2 a. Stella Iacob oritur,
Sol de luna nascitur,
Res fulgent eximiae.

2 b. Lux nube progreditur,
Spina flos producitur
Dulcoris et gratiae.

3 a. A rivo fons trahitur,
Quo cunctis protenditur
Viva vena veiriae.

3 b. Sicut nobis canitur,
Rubus igne cingitur
Sed expers angustiae.

4a. In scriptura legitur:
Ros in vellus funditur
Nil passum molestiae.

4 b. Castellum non laeditur,
Quod Iesus ingreditur,
Gigas excellentiae.

5 a. Neque porta panditur,
Qua Christus egreditur,
Verus sol iustitiae.

5 b. Puer circumciditur,
Parvo lacte pascitur
Panis subsistentiae.

6 a. Tribus magis quaeritur,
Pauperculus colitur
Donis condecentiae.

6 b. Senis ulnis geritur
Et legali subditur
Homo novus hostiae.

7 a. Iordane abluitur,
Temptatur, adfligitur
Ieiunans esurie.

7 b. O, pastor percutitur,
Novellae dispergitur
Grex totus ecclesiae.

8 a. O, templum dissolvitur,
Traditus illuditur
Agnus innocentiae.

8 b. Passus crucifigitur,
Hora nona moritur,
Flete, Sion filiae.

9 a. Infernus infringitur,
Populus eripitur
De lacu miseriae.

9 b. Morte mors destruitur,
Fidelibus redditur
Summae vita patriae.

10 a. Sepultus custoditur,
Victor non invenitur
Surgens tertia die,

10 b. Qua salus tribuitur,
Captivus redimitur,
Haec dies laetitiae.

11a. Mariae ostenditur,
Qui fratribus vehitur
Gaudium victoriae.

11b. Ad caelos assumitur,
Paracletus mittitur,
Dantur linguae variae.

12 a. Quod veniet, creditur,
Et tunc condemnabitur,
Qui vixerit impie:

12 b. Sed iustus salvabitur
Atque coronabitur
In aeterna requie,

13. Ubi Deus laudabitur,
Amabitur, videbitur
Revelata facie.