60. In Dedicatione Ecclesiae.

1 a. Congaudentes iubilemus
Harmoniae novum genus
Concordi melodia;

1 b. Deponamus vetus onus,
Dulcisque resultet sonus
Ex nostra concordia.

2 a. Templum Christi veneremur,
Ne ab eius defraudemur
Fidei victoria;

2 b. Nam in petra iam fundatum
Permanebit roboratum
Per immensa saecula.

3 a. Non venti simulatorum,
Non aquae haereticorum,
Neque suorum fautorum
Infamis audacia

3 b. Praevalebunt destruere
Neque portas removere,
Quia vivit Christus vere,
Qui fundavit talia.

4 a. Christus petra nuncupatur,
Quae in scandalum paratur
Ei offendentibus ;

4 b. Pater vero demonstratur
Gloriamque praemiatur
Sibi adhaerentibus.

5 a. Ergo deprecemur Christum,
Ut locum conservet istum
Matris nostrae ecclesiae,

5 b. Ut in sponso suo iuncta
Noxia repellat cuncta
Conservetque assidue.

6 a. Sicut ex Adae fit costa

Eva, sic ecclesia nostra

Fit ex Christi latere,

6 b. A quo cuncta sacramenta
Sua sumunt fundamenta
Dantque locum veniae.

7 a. Iesu bone, pastor vere,
Templum istud tu tuere,
Nobis quoque miserere
Nostra delens crimina,

7 b. Ut post vitam corporalem
Mereamur spiritalem,
Consequamur aeternalem
In caelesti patria.