61. In Dedicatione Ecclesiae
apostolorum Simonis et Iudae.

1. Regem regum,

2 a. Sion dominatorem
atque manu
fortem David,

2 b. Caelestis Ierusalem
possessorem,
Salomonem,

3 a. Virgo perennis,
casta parens
et fecunda
laudat ecclesia,

3 b. Huius in aula
dedicata
caste nupta
suo pacifico.

4 a. Haec regis
ducta lecto
de deserto
Idumaeae

4 b. Fit templum
per prudentes
architectos
vivi Dei,

5 a. Ipsa praesentia
deitatis
quos replet scientia.

5 b. Quorum collegio
sanctissimo
Simonis atque Iudae

6 a. Annuis gaudemus
natalitiis,

6 b. Quis et haec honori
rutilat aula.

7 a. Hos tam laudabiles
procuratores,

7 b. Rerum effectores
mirabilium,

8 a. Ipse Christus suis
Herveldensibus

8 b. Eois misertus
misit finibus.

9 a. Eia, congeminatis
laetabundi
resonemus gaudiis

9 b. Hac domo trinitatis,
cantilenis
harmoniae dulcibus

10. Omnium sanctificatori Domino.