62. Die Dominica.

1a. Gaude, plebs fidelium,
Die, qua rex omnium
Mundum inchoavit;

1b. Hac in die iubila,
Qua mundana nubila
Idem effugavit.

2 a. Haec est dies triumphalis,
Mundo grata perdito,
Dans solamen nostris malis
Hoste iugo subdito.

2 b. Haec est dies specialis
Tanto nitens radio,
Quod peccati fit finalis
Mali malo irrito.

3 a. Cum surrexit homo Deus,
Quo salvatur homo reus
Et tendit ad gloriam.

3 b. In hac die caelitus
Missus est paraclitus
Dans linguarum gratiam.

4 a. Hac in die iucundemur
Hanc et plene veneremur
Novi ritu cantici:

4 b. Haec est dies decorata
Et honore sublimata
Nominis dominici.

5 a. Deus, diem hanc qui fecit
Et diebus hanc praefecit,
Nos in bono roboret;

5 b. Tali die qui surrexit,

Sanctum flamen mundo vexit,
Nos a malo liberet.