COLLATIO LXII.

(Vers. 8.). Clarifica me, Pater, apud temetipsum claritate, quam habui, priusquam mundus fieret.

1. Nota, quod Christus clarificatus fuit in passione causaliter: Ioannis duodecimo : " Venit hora, ut clarificetur Filius hominis. Amen dico vobis: Nisi granum frumenti cadens in terram mortuum fuerit " etc.

Clarificatus fuit in resurrectione actualiter; Ioannis decimo tertio: " Deus clarificavit eum in semetipso ", continua clarificatione.

Clarificatus fuit in Apostolorum praedicatione evidenter: Ioannis decimo septimo: (Clarificatus sum in eis" et ideo dicitur, Ioannis ultimo, de Petro: "Hoc dixit Iesus, significans, qua morte esset clarificaturus Deum".

2. Nota autem, quod eius clarificatio manifestata est in tribus: in miraculorum operatione; Marci ultimo " Signa eos qui crediderint, haec sequentur "; in linguarum divisione: " Apparuerunt eis dispertitae linguae tanquam ignis ", Actuum secundo: in charismatum infusione: primae ad Corinthios duodecimo: " Divisiones gratiarum sunt, idem autem spiritus ". - Et nota, quod operatio miraculorum clarificat eius potentiam: divisiones linguarum, eius sapientiam: infusio charismatum, eius bonitatem.

3. Nota postea, quod Christus fuit clarificatus a Deo Patre: unde hic: Clarifica me, Pater etc.: a Spiritu sancto: Ioannis decimo sexto : "Ille me clarificabit, quia de meo accipiet"; a discipulis: Ioannis ultimo: " Hoc dixit, significans, qua morte Petrus esset clarificaturus Deum". - Recollige ergo, quod clarificatus fuit Christus tripliciter et per tria et a tribus: tripliciter, quia in passione, in resurrectione et in Apostolorum praedicatione: per tria, quia per miraculorum operationem, per linguarum divisionem, per charismatum infusionem: et a tribus, scilicet a Deo Patre, a Spiritu sancto et a discipulis.

4. Claritate, quam habui, priusquam mundus fieret. Nota, quod multiplex claritas invenitur in Christo, quae etiam communicatur homini iusto. Est enim claritas sapientiae; Sapientiae sexto " Clara est et quae nunquam marcescit sapientia ".

Claritas gratiae; secundae ad Corinthios tertio: "Nos revelata facie gloriam Domini speculantes, in eandem imaginem transformamur a claritate in claritatem tanquam a Domini spiritu ".

Claritas famae: Sapientiae octavo : " Habebo propter hanc " sapientiam " claritatem ad turbas et honorem apud seniores ". - Claritas gloriae; ad Philippenses tertio: " Salvatorem exspectamus, qui reformabit corpus humilitatis nostrae configuratum corpori claritatis suae ".

Capitulum XVIII. Haec cum dixisset Iesus.

Annotato) 68.

(Vers. 1.). Haec cum dixisset Iesus, egressus est trans torrentem Cedron, ubi erat hortus etc.

Nota, quod Christus in horto fuit captus, in horto sepultus, in horto post resurrectionem inventus. - in horto fuit captus, sicut hic declarat historia: Ubi erat, inquit, hortus, in quem introivit ipse et discipuli eius: et postea sequitur de captione.

In horto fuit sepultus, unde Ioannis decimo nono: " Erat in loco, ubi crucifixus est, hortus, et in horto monumentum"; et sequitur, quod ibi

" posuerant Iesum". - In horto fuit inventus: unde et Maria, quando primo vidit Dominum, existimavit, eum hortulanum esse, Ioannis vigesimo, quia scilicet in horto invenerat eum. - Per hoc intellige spiritualiter triplicem hortum, hortum scilicet, in quo Christus persecutionem patitur. Hic est hortus mundanae concupiscentiae; de quo tertii Regum vigesimo primo : " Ait Achab ad Naboth ", id est diabolus ad hominem: " Da mihi vineam tuam, ut faciam mihi hortum olerum". - Hortus, in quo Christus absconditur, est hortus sacrae Scripturae; de quo dicitur animae contemplativae Canticorum octavo: " Qui habitas in hortis, amici auscultant te: fac me audire vocem tuam ".

Hortus, in quo Christus invenitur, scilicet hortus fidelis conscientiae: de quo Canticorum sexto: "Descendi in hortum meum, ut viderem poma convallium"; et iterum in eodem: "Dilectus meus descendit in hortum suum ad areolam aromatum ".