67. In Conceptione BMV.

1 a. Astra caeli resplendeant,
Nunc sol et luna clareant,
Stella maris oritur,

1b. Quae Christi fert navigium,
Quae caeli dat vestigium,
Per quod ad portum itur.

2 a. Reges, gentes ambulabunt,
Omnes fideles navigabunt
Splendore huius ortus,

2 b. Per quem lumen de lumine,
Numen venit de numine,
Hic est salutis portus.

3a. En, alma mater veniet,
Ex qua splendor eminet
Ac lux patris aeterni,

3 b. Quae illustrat omnem hominem,
Senem atque iuvenem,
Ex gratia perenni.

4 a. Dat viam pacis gratiae
Et statum verae patriae
Nec non regni caelestis,

4 b. Ubi vera laetitia,
Nec aliqua tristitia
Deinceps erit maestis.

5 a. Virgo, vitis vmarium
Panisque promptuarium
Et adipis frumentum,

5 b. Per quod potus datur vitae,
Per quod manna venit rite
Et vivax alimentum.

6 a. In nos sere castos mores
Et fervores ac calores
Nostrae carnis remove

6 b. Et amore castitatis
Et fervore caritatis
Tuo nato confove.

7 a. In hoc novo tuo festo,
Virgo, nobis nunc adesto
Et in mortis turbine,

7 b. In extremis ne damnemur,
Sed in caelis collocentur
Gratioso semine.

8 a. O veri solis aurora,
Veni, veni sine mora,
Cum mori est necesse,

8 b. Tuere nos et libera,
Tunc, virgo salutifera,
Noli nobis deesse.