69. In Conceptione BMV.

1 a. Laudes promat nisu toto
Plebs fidelis voce, voto,
Corde, mentis iubilo:

1b. Sancta templi velum tegit,
Dei mons sub nube degit,
Sol latet sub nubilo.

2 a. Annae ventris arca celat
Feminam, quae carne velat
Virum viri nescia;

2 b. Donat virgam radix Iesse,
Virga fervet fructu messe
Redundante gratia.

3 a. Haec maxillae fons Samsonis,

Favus fluens miris donis

Copia charismatum,

3 b. Templum veri Salomonis,
Aula summis plena donis
Et domus aromatum.

4 a. Helizaei parva cella,

Ante, post clausa, procella,
Per quam unctus graditur,

4 b. Radium sic profert stella,
Illibata fit puella,

Ex qua Deus nascitur.

5 a. Fabricatur mensa rite,
In qua sistit panis vitae
Cor firmans humilium,

5 b. Cibus cibum dat Heliae,
Datur vas in potum viae
Tollens mortis taedium.

6 a. Patet arcus pietatis

Sternens hostem feritatis
In sagitta filio,

6 b. Pharetra divinitatis,

Donans partem cum beatis
In Ioseph peculio.

7 a. Saccus scyphum sacrum reddat,
Ex quo potum vitae prendat
Vere Deum diligens,

7 b. Ex oliva liquor tendat,
Iugis ignis nos accendat
Lucens, docens, dirigens.

8 a. Virgo mater, mater Dei,
Per te fiunt salvi rei,
Iustis datur gratia;

8 b. Nos in anno iubilaei
Sempiternae lux diei
Perlustret in gloria.