70. In Conceptione BMV.

1 a. Iubilemus iucundanter
Laeta mente incessanter
Adorantes Dominum,

1 b. Qui hoc festum celebrari
Ac decenter honorari
In salutem hominum

2 a. Praeelegit et dotavit,
In quo matrem expiavit
Ab omni piaculo.

2 b. Hoc prophetae propalabant,
Patriarchae enodabant
Codicum oraculo,

3 a. Quae per vates nuntiata
In te sunt ratificata,
Maria, divinitus.

3 b. Cum tis infecundus pater
Et grandaeva tua mater
Per angelum caelitus

4 a. Sunt effecti adlocuti,
De concepto fetu tuti
Divino spiramine,

4 b. Nutu Dei quique parens
Constitutus Deo parens
Laetus a solamine.

5 a. Arca Dei Noetiva

Et columba cum oliva,
Vera pacis nuntia,

5 b. Pulchra Sara nobis ridens,
Sibi risum dari videns
Isaac ex gratia.

6 a. Hesther uxor tu Asueri,
Per quem Aman contorqueri
Meruit suspendio.

6 b. Audi, pia, ne gravemur
Et in aevum cruciemur
Gehennae succendio.

7 a. Ab antiquis praeconisata,
Per aenigma praesignata
Es, o Iesse virgula.

7 b. Eia, David Sunamitis,
Fons signatus, vera vitis,
Iesu Christi vehicula.

8 a. O amica pulchra tota,
Carens naevo atque nota,
Speculum abs macula,

8 b. Sponsa prudens Salomonis,
Vellus madens Gedeonis,
Vernans ignis facula.

9 a. Iesus Christus praeservavit,
Quod sibi praedestinavit,
Vas purum a vitio,

9 b. In quo homo incarnari
Et in mundum generari
Novit ab initio.

10 a. Hac in die, qua concepta
Dei materque adepta
Ac undique circumsaepta
Septemplici gratia,

10 b. Summo bono fallerata
Et ab aevo propagata,
Abs labe in mundum nata
Est carens pellacia.

11a. Cum haec dies in diebus
Lucet prae stellis ut Phebus
Miris signis atque rebus
Omnibus sanctissima.

11a. Hanc illuxit sol de caelo
Et velavit divo velo
Confirmando sacro zelo,
O dies clarissima !

12 a. Q quam clara dies illa,
In qua mater et ancilla
Nova pneumatis scintilla
Supplantavit noxia;

12 b. Dies nimis veneranda

Ac prae cunctis illustranda,

Digna laude commendanda,

Per quam redit gratia.

13 a. O zelatrix, vegetare,
Ne nos sinas vapulare,
Saevum hostem conculcare
Te precamur, sustentare,
Ostendens solacia.

13 b. Hastam vibra, sterne funda,
Peltam sume, sola munda,
Ne pellacis Stygis unda
Demergendo ad profunda
Attrahat fallacia.

14 a. O Maria pura, vera
Iesu Christi puerpera,
Asta fortis in statera,
Corda nostra fac sincera,
Perduc ad convivium.

14 b. Munda vitam, muta mores,
Post pressuram et labores
Huius festi laudatores
Introducas ad honores
Supernorum civium.