72. In Conceptione BMV.

1 a. Totus mundus hilarescat
Ex ingenti gaudio
Et fidorum mens ardescat
Virtutum incendio
In Mariae laudibus.

1b. Maria concepta fuit
Divino consilio,
Ac potestas Orci ruit,
El fit mater filio
Pro nobis exsulibus.

2 a. Haec fuit sanctificata
Ex virtute supera,
Mox cum fuit obligata
Intra matris viscera
Culpae carnis labilis.

2 b. Nunquam tamen ex tunc laesit
Ulla culpae gravitas
Hanc, sed Deo semper haesit,
Et ipsius caritas
Vere fuit stabilis.

3 a. Ista est regina caeli,

Per quam fluit gratia
Unicuique fideli
Posito angustia,

Dum hanc quaeritsedulo.

3 b. Haec Holofernem mactavit
Ex virtutum culmine
Assuerumque placavit
Sua pulchritudine
Mortem cessans populo.

4 a. Ridet ex hac paradisus
Et congaudent caelici,
Maeret Belial divisus,
Semet cernens eici
A superna gloria.

4 b. Ergo ipsam deprecemur,
Ut Deus sanctificet
Nos, qui ipsam reveremur,
Et sursum laetificet
Adepta victoria.