81. In Annuntiatione BMV.

1 a. Gaude, virgo mater Christi,
Quia sola tu fuisti
Digna Deum parere,

1 b. Non in parta tamen tristi.
Sicut mos est, peperisti,
Sed divino munere.

2 a. Partus tuus partus laetus,
Non in partu tuo fletus,
Nullus maeror, nullus metus,
Dum portasti filium.

2 b. Salutata dum fuisti,
De salute concepisti,
Et sic virgo peperisti
Salutare gentium.

3 a. Ut audisti illud ave,

Quod tam dulce, tam suave
Nuntiavit angelus,

3 b. Voce venter intumebat,

Quia ventrem mox implebat
Virtus sancti spiritus.

4 a. Verbum quidem introivit,
Atque verbum hinc exivit,
Et sic tuus parturivit
Venter viri nescius.

4 b. Prodit puer de puella
Sana castitatis cella,
Sicut exit lux de stella
Et de sole radius.

5 a. Iste puer [princeps] magnus,
Princeps pacis, pius agnus,
Leo, gigas geminus ;

5 b. Hic Samson, [hic] Elisaeus,
Ioseph, Ionas Ninivaeus,
Hic caelorum dominus.

6 a. Hic est, cuius Isaias
Iussit praeparare vias,
Hic est Enoch, hic Elias,
Hic est Dei filius,

6 b. Hic, quem senex exspectavit,
Quem Iohannes baptizavit,
Hic, quem totus praedicavit
Prophetarum cuneus.

7 a. Gedeon in

vellere et area,
Moyses in

rubo et in flammula,
Aaron in

arefacta virgula.

7 b. Vellus madens

non humectat aream,
Rubus ardens

non perit per flammulam,
Amygdala,

flores ornant virgulam.

8 a. Res a saeclis inaudita,
Quod puella parit ita,
Et quod ita sunt unita
Caelestibus terrestria.

8 b. Leges rerum et natura
Stupent, quia creatura
Creatorem, virgo pura
Parit et patrem filia.

9 a. Gloriosa mater Dei,
Magni quoque Nazarei
Mater Iesu, nostrae spei,
Mater misericordiae,

9 b. Te precamur, tu precare
Tuum natum nos iuvare,
Ut possimus te laudare
In paradiso gloriae.