84. In Visitatione BMV.

1 a. Exsurgens diva ratione
Humillima devotione
In montana abiit

Elisabeth congratulari.

1 b. Nec oraculo angelico
Dubia nec vaticinio,
Sed festina prodiit

Cognatae pie commorari.

2 a. Progressa tunc exsiliit,
Cum eam virgo viserit
Per pneuma gravidata
Post Ave Gabrielis.

2 b. Vociferavit anula:
Tu, benedicta domina
Nec viro fecundata,
Gestas regnantem caelis.

3 a. Unde mihi privilegium,

Ut princeps visitet famulum
Gestatrice virgine?

3 b. Verbo facto salutifero
Exsultavit infans utero,
Miro hoc fit ordine.

4 a. Gerunt thesauros reconditos
Et arcana secretorum;

4 b. Sciscitare plane possumus,
Rimari nec est doctorum.

5 a. Hanc complicatus
ab humanis
Praegnat ancillam
verbum patris.

5 b. Mysticis haec non
carent donis,
Expletae nam sunt
altithronis.

6 a. Gaudent binae amplexando,
Iucundantur delectando
Spiritualibus iubilis.

6 b. Sic grandaeva, sic puella,
Quae est veri solis cella,
Laetantur fulcitae filiis.

7 a. Ex summo bono
Superno dono,

Quod acceperat,
Transcenso cursu hominum,

7 b. Ut Lucas refert,
Maria profert

Nunc: Magnificat
Anima mea Dominum.

8 a. Mansit autem tunc mensibus
Tribus Maria laribus
Sacerdotis Zachariae,
Muti nota diffidiae.

8 b. Fac nos tecum commanere,
In aeternum congaudere,
Ubi regnas perlucide
Cum patre, prole, flamine.