85. In Visitatione BMV.

1 a. Caeli cives iam congaudent
Virgini et semper audent
Congaudere, ut collaudent
Matrem Dei dulcius.

1 b. Gratulentur viatores
In hac valle, peccatores
Pravos corrigendo mores,
Ut vivant consultius.

2 a. Super Christum se fundavit,
Mundum istum conculcavit,
Dum Maria festinavit
Visere Elisabeth.

2 b. Flagrat pectus virginale,
Promit flatus verbum tale,
Nondum natus sensit quale
Iohannes videlicet.

3 a. Paupertatis de crumena
Caelum ditans Deo plena
Surgit mente cum serena,
Vult montana scandere.

3 b. Praecursoris genetricem
Sic salutat, ut felicem
Infans Christo reddens vicem
Scit secreta pandere.

4 a. Gestis verba confirmantur,
Certis signis demonstrantur,
Rex et miles bi effantur
Uteris per gaudium.

4 b. Fidem sumit Zacharias
Pridem mutus ac per vias
''Benedictus sit Messias
''Novum edit canticum.

5 a. Spe deleta per numisma,
Quo ecclesiae stat schisma.
Diabolicum sophisma
Solve, mater gratiae.

5 b. Hic electa sponsa Christi
Dissipatam statu tristi
Reformatam redde isti,
Virgo pulchra facie.

6 a. Iam devotis praestat plausum
Verbum caro ventre clausum,
Quod Iohanni dedit ausum
Iubilandi intime.

6 b. Ubicunque sunt et erunt,
Qui per viam voto quaerant
Templa, preces, quas fuderunt,
Captet datrix veniae.

7 a. O electa visitatrix,
Et perfecta mediatrix,
Sola recta consolatrix,
Nos in morte visita,

7 b. Ut a lucta eruamur,
Tuo ductu deducamur,
Tuo fructu perfruamur
Iugiter in patria.