86. In Visitatione BMV.

1a. Cantet christiana musa
Pia voce non confusa
Virginis praeconium,

1 b. Quae omni labe seclusa.
Sancto flamine perfusa
Dei tulit filium.

2 a. Seipsam humiliavit,
Elisabeth visitavit
Inferens solacium,

2 b. Senem ventrem fecundavit
Zacharias et fundavit
Mirum puerperium.

3 a. Elisabeth visitatur,

Iohannes praeco laetatur
Exsultans in utero,

3 b. Virgo mater exaltatur,
Clausus infans prophetatur
In ventre virgineo.

4 a. Qui, priusquam nasceretur.
Decuit, ut lactaretur
In virginis filio,

4 b. Dum uterque clauderetur
Ventre, alter lactaretur
Gestiens in utero.

5 a. Anus sterilis vocata
Conceptu fuit impleta,
Confecta iam senio,

5 b. Valde fuit admirata,
Quod fuerit visitata
Humili ergastulo.

6a. Quid est? inquit, non sum digna,

Ut mater Dei benigna

Me visitet sedulo,

6 b. Tibi, mater tam insigna,
Non sufficit laus condigna
Nec sancta devotio.

7 a. Ut hoc festum venerandum
Et merito celebrandum
Laudetur praeconio,

7 b. Mysterium memorandum
Et digne concelebrandum
Est et admiratio.

8 a. Omnes ergo exsultemus
Et Domino iubilemus,
Virescat devotio,

8 b. Sanctum flamen adoremus,
Virginem matrem laudemus
Cum patre et filio.