87. In Visitatione BMV.

1 a. Congaudeamus Mariae,
Visitanti in hac die
Iohannem et Elisabeth.

1 b. Surgens mater digna Dei,
Advocata facta rei,
Abiit ad Elisabeth.

2 a. Per montana festinanter

Venit virgo incunctanter

Ad domum Elisabeth,

2 b. Quae in civitate sancta
Morabatur haec cognata
Sterilis Elisabeth.

3 a. Inde tamen nunc fecunda
Senex proba et iucunda
Zachariae Elisabeth;

3 b. Intrans ergo gloriosa,
Fructu sancto generosa,
Salutat Elisabeth.

4 a. Salve, bona consobrina,
Quam sic gratia divina
Ditavit, Elisabeth.

4 b. Cuius vocem salutarem
Ut audivit spiritalem,
Miratur Elisabeth.

5 a. Praesentia salvatoris

Gaudent matris praecursoris
Viscera, Elisabeth,

5 b. Ubi exsultavit gaudens
Praeco Domini, Iohannes,
Filius Elisabeth.

6 a. Cuius sanctitate immissa
Facta fuit prophetissa
Dicens sic Elisabeth:

6 b. Unde hoc, quod mater Dei

Venit huc ministra mei,

Miserae Elisabeth.

7 a. Inter feminas beata,
Fructu divino praegnata,
Domina Elisabeth.

7 b. Et cur credis, benedicta,
Implebuntur in te dicta;
Finit sic Elisabeth.

8 a. Inde oscula sequuntur,
Amplexusque repetuntur
Mariae et Elisabeth.

8 b. Nec abfuere tractatus

Nec Zacharias beatus

A domo Elisabeth.

9 a. Sic confabulantes pluries
Consumpserunt menses tres,
Dicat hoc Elisabeth.

9 b. Omnes ergo supplicamus,
Exaudi, quod suspiramus,
Cum sancta Elisabeth

10 a. Et Maria genetrice,
Nostra vera directrice,
In hac vallis miseria,

10 b. Visitemur inspirati,
Ut vivamus reformati
In caelesti patria.