90. In Purificatione BMV.

1 a. Sion sancta, laetabunda,

Plebs fidelis et iucunda,

Exsulta cum tripudio,

1 b. Quantum vales in hac valle,
Dulce melos Christo psalle,
Exhilarata gaudio.

2 a. Tuum adorna thalamum,
Temet decora plurimum
Modulatis organis,

2 b. Cita senes ac iuvenes,
Coniugatas et virgines,
Viduas cum tympanis.

3 a. En, Maria, mater pia,
Dei gestans filium,
Quem admisit et emisit
Ut crystallus radium,

3 b. Cum peregit, sicut legit
Moysi volumine,
Templum intrat et illustrat
Nati sui lumine.

4 a. Turturum par castitatem,
Columbarum pietatem
Signant, dona mystica,

4 b. Haec pro eo proferuntur,
Sed sic nobis proponuntur,
Sit ut vita caelica.

5 a. Erat tunc Hierosolymis

Senex iustus et nobilis,

Simeon plenus gratia,

Adeptus vitae spatia,

5 b. Ne visum busto clauderet,
Donec promissum cerneret,
Qui creditur Emanuel,
Iesus, salvator Israel.

6 a. Hic imbutus et instructus
Spiritu veraciter
Ipsa hora sine mora
Templum it celeriter.

6 b. Noto Christo die isto

Ulnis hunc amplectitur,
Fatur vates, reddit grates,
In pace dimittitur.

7 a. Anna quidem prophetissa,
Tantis sacris tunc admissa,
Devota longo termino,

7 b. Super Christo manifeste
Cunctis lege loquens teste
Confitebatur Domino.

8 a. Certumque, quia deinceps
Omnis homo fit particeps
Huius alacritatis,

8 b. Verae qui capax fidei
Credit Christum verbum Dei,
Studet iungi beatis.

9 a. Ergo cuncti iam peruncti
Iesu sacro chrismate
Catervatim, singillatim
Claro plaudant neumate,

9 b. Mente tota et devota
Cereis fulgoribus
Festum agant, pure pangant
Sacris compti moribus.

10 a. Sed intellegant per ceram
De Maria carnem veram,
Fiatque fides rectior.

10 b. Ergo flamma signat numen
Maiestatis vel cacumen,
Spes inde fiat certior.

11a. Linum praetendit hodie
Opus misericordiae.

Quod nobis lumen recipit.

11 b. Quo absque nil est claritas,
Quin potius calamitas
Cunctos ardens interficit.

12 a. Flagitemus et oremus
Aulam intra regiam
Genetricem ac nutricem
Domini egregiam,

12 b. Iesum oret ac imploret
Celebri precario,
Ut nos ducat et indueat
Poli consistorio.