91. In Purificatione BMV.

1a. Adest dies veneranda.
Qua pura purificanda
Venit virgo virginum;

1b. Haec dies quadragesima,
Qua sublimis humillima
Venit expers criminum.

2 a. Hierusalem virguncula,
Ab omni pura macula,
Ut purgetur, properat ;

2 b. Sed quid purgandum fuerit
In hac, recensendum erit,
Quae nil sordis egerat.

3 a. Legis mulieres erant,
Quae semine conceperant,
Instituto obnoxiae,

3 b. Sed, Maria, mater Christi,
Quae spiritu concepisti
Sancto regem gloriae,

4 a. Cum virum non cognoveris,
Sed virgo semper fueris
Repleta munditie,

4b. Nec sorduisti sanguine,
Quo mundabantur feminae
Viri sparsae carie,

5 a. His te non lex astrinxerat,
Sed quod figura fuerat,
Tibi quis futurus erat
Status in caelestibus,

5 b. Ad quem te vexit gloriae
Rex in quadragena die
Te subtrahens miseriae
Mortis fractis nexibus.

6 a. Absque fide, caritate

Nos mortales nascimur,

6 b. Mens, voluntas sunt purgatae,
Sensu mortis loquimur.

7 a. Fide, cantate plena

Virgo ad esse prodiit,

7 b. Non mundata, sed serena
Mortis legem subiit.

8 a. Dies hanc ergo ad gloriam
Quadragena fert Mariam,
Quae purgata caeli viam
Meruit ex saeculo.

8 b.........

9 a. Quota fert huiusce natum
Hora ab inferis levatum,
Dies superexaltatum
Ad caelum empyreum,

9 b. Dum lex vetus per saeculum
Duravit offendiculum,
Nec sic haec huius vinculum
Cor tenet virgineum.

10 a. Servat virgo mater regis
Instituta suae legis
Sub utroque tempore:

10 b. Nos decet parere legi,

Qua placemus summo regi
Vitato facinore.

11 a. Nam Moysi modo legi

Paret, simul ipsa regi

Censet lege gratiae.

11b. O Maria, legis arca,

Qua quievit rex monarcha,
Iesus, princeps gloriae.

12 a. Virgo mitis et benigna,
Omni laude virgo digna,
Christo nos concilia.

12 b. Ora patrem, iube natum
Ducere nos ad optatum
portum, mater, filia,

13 a. Ut videre laetabundi
Valeamus Deum mundi
Huius post exsilia.

13 b. Cuius vultu satiati,
Omni dote decorati
Laetemur in patria.